9 ماۋسىم - سايلاۋ كۇنى كۇنى جەلى قولدانۋشىلارىنىڭ قىزۋ تالقىسىنا تۇسكەن جىگىتتىڭ كىم ەكەنى بەلگىلى بولدى. ساربازعا گۇل سىيلاعان ءبۇلدىرشىننىڭ اناسى جەلىدە جاڭا جازبا قالدىرىپ، ونداعى سىمباتتى جىگىتتىڭ كىم ەكەنىن ايتقان دەپ حابارلايدى.
9 ماۋسىم كۇنى ەكى جاسار ءبۇلدىرشىننىڭ ارقاسىندا بۇكىل ەلگە تانىلعان جىگىتتىڭ اتى-ءجونى – شاميل حاسانوۆ بولىپ شىقتى."كىشكەنتاي قىزىم مەن مىنا سىمباتتى جىگىتتىڭ جەلىدە كەڭىنەن تانىلىپ، جۇرەكتەرىڭىزدىڭ تۇبىنەن ورىن العانىنا 3 كۇن ۋاقىت ءوتتى. جەلىدە مەنەن سۋرەتتەگى جىگىتتىڭ اتى-ءجونىن، الەۋمەتتىك جەلىلەردەگى پاراقشالارارىن، ءتىپتى نومەرىن سۇراعان قىزدار كوپ بولدى.
ءتىپتى ءوزىن ءشاميلمىن دەپ تانىستىرعان دا تابىلىپ جاتتى. ماعان كۇنى كەشە عانا ءشاميلدىڭ جاقىندارى حابارلاسىپ، ءمان-جايدى انىقتاپ جازۋىمدى ءوتىندى. سولاردىڭ رۇقساتىمەن تومەنگى پوستتى جازىپ وتىرمىن.
حالايىق فوتوداعى جىگىت پەن ەڭ ادەمى كۇلكىنىڭ يەسى – شاميل حاسانوۆ. وسى قاراپايىم جىگىت ءوزىنىڭ ءىنىسى ارقىلى ماعان حابار جەتكىزدى.
"ول مەنىمەن جانە قىزىممەن كەزدەسۋگە دايىن ەكەنىن ايتقان. قۇدايعا شۇكىر سول سۋرەتكە قاتىستى قانداي دا ءبىر تۇسىنىسپەۋشىلىكتەر ورىن الماپتى. شىنى كەرەك مەن سول ءۇشىن قاتتى ۋايىمداعان ەدىم. وسى ءۇشىن ۇلتتىق ۇلانعا جانە وسىنداي جىگىتتى تاربيەلەگەن ونىڭ اتا-اناسىنا زور العىسىمدى ايتامىن...", - دەپ جازبانى باستاعان ول.
جازبا سوڭىندا بالاقايدىڭ اناسى سول كۇنى وزدەرىنەن تەرىس اينالماعان ءتارتىپ ساقشىسىنا ءوز العىسىن ايتقان. "شاميل وسى پوستتى وقيسىز دەگەن سەنىمدەمىن. سىزگە سول كۇنى بىزدەن تەرىس اينالماي، كىشكەنتايىمنىڭ گۇلىن قابىل العانىڭىزعا راحمەت ايتامىن. سىزگە وسى ومىردە بار بولعانىڭىز ءۇشىن، وسىنداي جىلىلىق سىيلاعانىڭىز ءۇشىن العىس ايتامىن. وزىڭىزبەن كەزدەسەمىز دەپ سەنەمىن، بۇل جولى دا قىزىم سىزگە تاعى دا ءبىر شوق گۇلىن اكەلەتىن بولادى", - دەگەن ول.
جەلى قولدانۋشىلارى اتالعان جازباعا قاتىستى جىلى لەبىزلەرىن جاۋدىرىپ جاتىر. ولار "جارايسىز", "كەزدەسىپ، سالەمىمىزدى ايتارسىز", "جىگىتتەر جاساسىن" دەگەن پىكىرلەرىن جارىسا جازعان.
ايتا كەتەيىك بۇعان دەيىن سايلاۋ كۇنى پوليتسەيگە گۇل سىيلاعان ءبۇلدىرشىننىڭ سۋرەتى كوپتىڭ قىزۋ تالقىسىنا تۇسكەن ەدى. جەتكىنشەكتىڭ اناسى سول كۇنى وسى وقيعانىڭ قالاي بولعانىن بايانداپ بەرگەن.
