9 maýsym - saılaý kúni kúni jeli qoldanýshylarynyń qyzý talqysyna túsken jigittiń kim ekeni belgili boldy. Sarbazǵa gúl syılaǵan búldirshinniń anasy jelide jańa jazba qaldyryp, ondaǵy symbatty jigittiń kim ekenin aıtqan dep habarlaıdy.
9 maýsym kúni eki jasar búldirshinniń arqasynda búkil elge tanylǵan jigittiń aty-jóni – Shamıl Hasanov bolyp shyqty."Kishkentaı qyzym men myna symbatty jigittiń jelide keńinen tanylyp, júrekterińizdiń túbinen oryn alǵanyna 3 kún ýaqyt ótti. Jelide menen sýrettegi jigittiń aty-jónin, áleýmettik jelilerdegi paraqshalararyn, tipti nomerin suraǵan qyzdar kóp boldy.
Tipti ózin Shamılmin dep tanystyrǵan da tabylyp jatty. Maǵan kúni keshe ǵana Shamıldiń jaqyndary habarlasyp, mán-jaıdy anyqtap jazýymdy ótindi. Solardyń ruqsatymen tómengi postty jazyp otyrmyn.
Halaıyq fotodaǵy jigit pen eń ádemi kúlkiniń ıesi – Shamıl Hasanov. Osy qarapaıym jigit óziniń inisi arqyly maǵan habar jetkizdi.
"Ol menimen jáne qyzymmen kezdesýge daıyn ekenin aıtqan. Qudaıǵa shúkir sol sýretke qatysty qandaı da bir túsinispeýshilikter oryn almapty. Shyny kerek men sol úshin qatty ýaıymdaǵan edim. Osy úshin Ulttyq ulanǵa jáne osyndaı jigitti tárbıelegen onyń ata-anasyna zor alǵysymdy aıtamyn...", - dep jazbany bastaǵan ol.
Jazba sońynda balaqaıdyń anasy sol kúni ózderinen teris aınalmaǵan tártip saqshysyna óz alǵysyn aıtqan. "Shamıl osy postty oqısyz degen senimdemin. Sizge sol kúni bizden teris aınalmaı, kishkentaıymnyń gúlin qabyl alǵanyńyzǵa rahmet aıtamyn. Sizge osy ómirde bar bolǵanyńyz úshin, osyndaı jylylyq syılaǵanyńyz úshin alǵys aıtamyn. Ózińizben kezdesemiz dep senemin, bul joly da qyzym sizge taǵy da bir shoq gúlin ákeletin bolady", - degen ol.
Jeli qoldanýshylary atalǵan jazbaǵa qatysty jyly lebizlerin jaýdyryp jatyr. Olar "Jaraısyz", "Kezdesip, sálemimizdi aıtarsyz", "Jigitter jasasyn" degen pikirlerin jarysa jazǵan.
Aıta keteıik buǵan deıin saılaý kúni polıeıge gúl syılaǵan búldirshinniń sýreti kóptiń qyzý talqysyna túsken edi. Jetkinshektiń anasy sol kúni osy oqıǵanyń qalaı bolǵanyn baıandap bergen.
