الماتى قالالىق دەنساۋلىق ساقتاۋ دەپارتامەنتىنىڭ ءباسپاسوز قىزمەتى اۆتوبۋستىڭ جاياۋ جۇرگىنشىلەردى قاعۋى سالدارىنان ءتۇرلى دەنە جاراقاتتارىن العان جۇرگىزۋشى مەن زارداپ شەككەندەردىڭ جاعدايى تۋرالى قوسىمشا اقپارات بەردى، دەپ حابارلايدى «ادىرنا» ۇلتتىق پورتالى.
زارداپ شەككەندەر مەن جۇرگىزۋشىنىڭ جاعدايى:
50 جاستاعى ايەل: بىرنەشە سىنىقتارى بار ناۋقاس جانساقتاۋ بولىمىنە جاتقىزىلدى. ناۋقاستىڭ جاعدايى ءارتۇرلى دەنە جاراقاتى پەن تراۆماتيكالىق شوكقا بايلانىستى اۋىر جاعدايدا.
55 جاستاعى ەر ادام: نەيروحيرۋرگيا بولىمىندە جابىق باسسۇيەك-مي جاراقاتى دياگنوزىمەن اۋرۋحاناعا جاتقىزىلدى.
36 جاستاعى اۆتوبۋس جۇرگىزۋشىسى: جابىق باسسۇيەك-مي جاراقاتىمەن جانە جەڭىل باس ميىنىڭ كونتۋزياسىمەن نەيروحيرۋرگيا بولىمشەسىنە جاتقىزىلدى. سونداي-اق كىشكەنتاي بالا №2 قالالىق كلينيكالىق بالالار اۋرۋحاناسىندا قارالىپ، دياگنوز قويىلدى: سول جاق تىزە بۋىنىنىڭ جۇمساق تىندەرىنىڭ كونتۋزياسى. گيپس سالىنىپ، امبۋلاتورلىق ەمدەۋگە جىبەرىلدى.
سونىمەن قاتار، بارلىق زارداپ شەككەندەرگە مەديتسينالىق كومەكتىڭ تولىق كەشەنى كورسەتىلگەنى، مامانداندىرىلعان بولىمشەلەر قاجەتتى كومەك پەن ەمدەۋدى كورسەتۋگە دايىن ەكەنى اتاپ ءوتىلدى.
ەسكە سالايىق، وقيعا كەشە، 22 جەلتوقساندا الماتى قالاسىندا بولدى. اپات سالدارىنان 3 ادام قازا تاپقانىن حابارلاعان بولاتىنبىز.
«ادىرنا» ۇلتتىق پورتالى
