سۇيمەگەن ايەل - جاڭبىر جاۋىپ تۇرعاندا قولشاتىرىڭ جوق ەكەنىن بىلسە، تاستاپ كەتەدى...

6815
Adyrna.kz Telegram

كۇن 

ەگەر شىنداپ قاجەتسىنسەڭ، كولىكتى ساتىپ، جاياۋ ءجۇرىپ تە ۇيرەنەسىڭ، تاڭعى بەستە ويانىپ، قانتسىز شاي ىشۋگە دە توزەسىڭ، تاماقتى تۇزسىز جەۋگە دە بەيىمدەلەسىڭ. توسەككە جالعىز جاتىپ، قولىڭمەن جانىڭداعى ادامدى ىزدەۋدى دە دوعاراتىن كۇن تۋار... ءالى سول ءۇشىن وزىڭە راقمەت ايتاسىڭ. سەبەبى، ءبىر كۇنى وسىلاي ءومىر سۇرگەن وزىڭە ۇنايتىن بولادى. سىرتى ءبۇتىن، ءىشى ءتۇتىن ومىردەن وسى جالعىزدىق جايلى بولا باستايدى. ءۇش كۇننەن كەيىن ادام كورگە دە ۇيرەنەدى دەۋشى ەدى عوي... اقىرىنداپ قورشاعان ورتانىڭ وزگەرگەنىنە دە ۇيرەنەسىڭ. كەزىندە «سەنسىز ءومىر سۇرە المايمىن» دەپ ولەردەي سۇيگەن ادامسىز دا ءومىر ءسۇرىپ جاتاسىڭ. سۇرەسىڭ. قولدان كەلگەنشە. «سەنسىز ءومىر جوق» دەيتىن ادامداردىڭ ءبارى اۋاعا ءسىڭىپ، جوق بولىپ كەتكەندەي كورىنەدى. ال سەن ءتىپ-ءتىرى، جاپ-جاس، دەنىڭ ساۋ، باسىڭ امان، شاپقىلاپ، ءومىر ءسۇرىپ جاتاسىڭ. ارى قاراي جىلجي بەرەسىڭ. قانتسىز شاي قانشالىقتى پايدالى ەكەنىن بىلەسىڭ. ميىڭدى جەيتىن قىرتتار جوق ءومىر تاماشا ەكەنىن تۇسىنەسىڭ. عالامدا ورنى تولماس دۇنيە جوق. كەتكەن/جوعالعان/ولگەننىڭ ءبارى باسقاسىمەن اۋىستىرىلادى. عالام ارى قاراي تىرشىلىك ەتەدى، تىنىستايدى، داميدى، ەڭ باستىسى – جاڭا ءومىر داعدىسىنا بەيىمدەلەدى. الايدا عالام ءۇشىن ورنى تولسا دا ماڭىزى ورتايمايتىن قۇبىلىستار بار، مىسالى - كۇن. بۇل وتتى جۇلدىز وزىنە ادال، ۇنەمى جارقىرىپ، كوكجيەكتەن تۇسپەيدى. ون سەگىز مىڭ عالامنىڭ بۇتىندىگىنە ۇلەس قوسادى. مەنىڭ نە ايتپاعىمدى ءتۇسىندىڭ بە؟ سەنىڭ ادامىڭدى باسقامەن اۋىستىرۋعا بولمايدى، ول كۇن سياقتى ءوز پرينتسيپىنە ادال كۇيدە، وربيتاسىنان اينىماي، تاڭ اتقان سايىن جارقىراپ، سەنىڭ ۇيىڭە شۇعىلاسىن توگىپ تۇرادى. ونى جوعالتىپ الام دەپ ەش قورىقپايسىڭ. قورقىنىش سىيلاعان ادام سەنىكى ەمەس.

سۇيگەن ايەل

ايەلدىڭ قالاعانى ازاتتىق تا، تاڭداۋ ەركى دە ەمەس-ءتى. ونىڭ ىزدەگەنى قايسار جىگىت، تياناقتىلىق. ايەلدىڭ بولمىسى سان ءتۇرلى، تۇسىنىكسىز بولۋى مۇمكىن. دەگەنمەن ازاماتتان ول تۇراقتىلىق پەن ماحابباتتى ىزدەيدى. ايەل زاتى ءار ساتتە وعان سەنىمدى، وعان كەرەكپىن دەگەنگە سەنىمدى بولۋى ءتيىس. ءاردايىم. قازىرگى زاماندا ايەل اتاۋلى ازامات دەگەن اتقا لايىق جان بار دەگەندى ەستىسە، ول ءۇشىن ءشول دالانى جاياۋ كەزىپ، تەڭىزدى كەشىپ وتۋگە ءازىر. ايەل ءۇشىن ەڭ قىمبات سىي - ىقىلاس. ۇزدىكسىز ىقىلاس. سۇيگەن ايەلىڭدى ارقاشان سىيلاپ، ءسۇيۋىڭ كەرەك. شىنداپ كەلگەندە، دوس، تانىستىڭ ءبارى جاعدايىڭ جاقسى كەزدە جانىڭنان تابىلاتىنى ءسوزسىز. ال باسىڭا كۇن تۋعاندا، قاسىڭدا قالاتىنى سۇيىكتىڭ عانا. وزگەلەر ساعان قولداۋ كەرەك كەزدە اياق استىنان جوق بولىپ كەتەدى، جانىڭدا قالاتىنى - سول عانا. ەر ادام ايەلدىڭ دەنەسىنە قول تيگىزگەندە - ءتانىن تانيدى. جانىن ءدىر ەتكىزگەندە - باقىتتى تانيدى. سۇيگەن ايەل ازاماتىنىڭ سوڭىنان ەرەدى. سوقىر، مىلقاۋ، اقىماق بولادى. بىراق جەردىڭ قيىرىنا باستاسا دا، سوڭىنان ەرەدى. قانداي كۇندە دە قاسىنان تابىلادى. سۇيمەگەن ايەل جاڭبىر جاۋىپ تۇرعاندا قولشاتىرىڭ جوق ەكەنىن بىلسە، تاستاپ كەتەدى.

وزگەرىس 

مەيىرىم مەن ماحاببات ادامدى جاقسى جاعىنا قاراي وزگەرتەدى دەگەن ءسوز بار. شىن ومىردە بۇل جۇزەگە اسپايتىنىمەن قويماي، ءتىپتى كەرىسىنشە اسەر ەتەدى. ءالى ەسەيمەگەن، ەركەتوتاي، وسال، دۇرىس قارىم-قاتىناس قۇرا بىلمەيتىن سەرىگىڭە بىلدىرگەن ماحاببات پەن مەيىرىم ونى وزگەرتپەك تۇگىلى، جامان مىنەزىن اسقىندىرىپ جىبەرەدى. سەنى جوعالتىپ الۋعا شىن قورىققاندا عانا ادام وزگەرەدى. تەك ول وزگەرىپ باستاعاندا قولداپ، ماقتاپ وتىرۋدى ۇمىتپاعايسىڭ. ماقتاۋ سول ساتتە عانا لايىق جەمىسىن بەرمەك.
الايدا مۇنداي ادامدار "سەنىڭ سىناپ-مىنەگەنىڭە بولا وزگەرگىم كەلمەيدى" دەپ قىرسىعادى. "الدىمەن مەنى جاقسى كور، سوسىن وزگەرەم" دەپ كۇپىنەدى. مۇنىسى ەلەس قۋ. سەنبە.

شىنار ءابىلدا

"ادىرنا" ۇلتتىق پورتالى

پىكىرلەر