Súımegen áıel - jańbyr jaýyp turǵanda qolshatyryń joq ekenin bilse, tastap ketedi...

877

Kún 

Eger shyndap qajetsinseń, kólikti satyp, jaıaý júrip te úırenesiń, tańǵy beste oıanyp, qantsyz shaı ishýge de tózesiń, tamaqty tuzsyz jeýge de beıimdelesiń. Tósekke jalǵyz jatyp, qolyńmen janyńdaǵy adamdy izdeýdi de doǵaratyn kún týar... Áli sol úshin ózińe raqmet aıtasyń. Sebebi, bir kúni osylaı ómir súrgen ózińe unaıtyn bolady. Syrty bútin, ishi tútin ómirden osy jalǵyzdyq jaıly bola bastaıdy. Úsh kúnnen keıin adam kórge de úırenedi deýshi edi ǵoı... Aqyryndap qorshaǵan ortanyń ózgergenine de úırenesiń. Kezinde «sensiz ómir súre almaımyn» dep ólerdeı súıgen adamsyz da ómir súrip jatasyń. Súresiń. Qoldan kelgenshe. «Sensiz ómir joq» deıtin adamdardyń bári aýaǵa sińip, joq bolyp ketkendeı kórinedi. Al sen tip-tiri, jap-jas, deniń saý, basyń aman, shapqylap, ómir súrip jatasyń. Ary qaraı jyljı beresiń. Qantsyz shaı qanshalyqty paıdaly ekenin bilesiń. Mıyńdy jeıtin qyrttar joq ómir tamasha ekenin túsinesiń. Ǵalamda orny tolmas dúnıe joq. Ketken/joǵalǵan/ólgenniń bári basqasymen aýystyrylady. Ǵalam ary qaraı tirshilik etedi, tynystaıdy, damıdy, eń bastysy – jańa ómir daǵdysyna beıimdeledi. Alaıda Ǵalam úshin orny tolsa da mańyzy ortaımaıtyn qubylystar bar, mysaly - Kún. Bul otty juldyz ózine adal, únemi jarqyryp, kókjıekten túspeıdi. On segiz myń Ǵalamnyń bútindigine úles qosady. Meniń ne aıtpaǵymdy túsindiń be? Seniń adamyńdy basqamen aýystyrýǵa bolmaıdy, ol Kún sııaqty óz prınıpine adal kúıde, orbıtasynan aınymaı, tań atqan saıyn jarqyrap, seniń úıińe shuǵylasyn tógip turady. Ony joǵaltyp alam dep esh qoryqpaısyń. Qorqynysh syılaǵan adam seniki emes.

Súıgen áıel

Áıeldiń qalaǵany azattyq ta, tańdaý erki de emes-ti. Onyń izdegeni qaısar jigit, tııanaqtylyq. Áıeldiń bolmysy san túrli, túsiniksiz bolýy múmkin. Degenmen azamattan ol turaqtylyq pen mahabbatty izdeıdi. Áıel zaty ár sátte oǵan senimdi, oǵan kerekpin degenge senimdi bolýy tıis. Árdaıym. Qazirgi zamanda áıel ataýly azamat degen atqa laıyq jan bar degendi estise, ol úshin shól dalany jaıaý kezip, teńizdi keship ótýge ázir. Áıel úshin eń qymbat syı - yqylas. Úzdiksiz yqylas. Súıgen áıelińdi árqashan syılap, súıýiń kerek. Shyndap kelgende, dos, tanystyń bári jaǵdaıyń jaqsy kezde janyńnan tabylatyny sózsiz. Al basyńa kún týǵanda, qasyńda qalatyny súıiktiń ǵana. Ózgeler saǵan qoldaý kerek kezde aıaq astynan joq bolyp ketedi, janyńda qalatyny - sol ǵana. Er adam áıeldiń denesine qol tıgizgende - tánin tanıdy. Janyn dir etkizgende - Baqytty tanıdy. Súıgen áıel azamatynyń sońynan eredi. Soqyr, mylqaý, aqymaq bolady. Biraq jerdiń qıyryna bastasa da, sońynan eredi. Qandaı kúnde de qasynan tabylady. Súımegen áıel jańbyr jaýyp turǵanda qolshatyryń joq ekenin bilse, tastap ketedi.

Ózgeris 

Meıirim men mahabbat adamdy jaqsy jaǵyna qaraı ózgertedi degen sóz bar. Shyn ómirde bul júzege aspaıtynymen qoımaı, tipti kerisinshe áser etedi. Áli eseımegen, erketotaı, osal, durys qarym-qatynas qura bilmeıtin serigińe bildirgen mahabbat pen meıirim ony ózgertpek túgili, jaman minezin asqyndyryp jiberedi. Seni joǵaltyp alýǵa shyn qoryqqanda ǵana adam ózgeredi. Tek ol ózgerip bastaǵanda qoldap, maqtap otyrýdy umytpaǵaısyń. Maqtaý sol sátte ǵana laıyq jemisin bermek.
Alaıda mundaı adamdar "seniń synap-minegenińe bola ózgergim kelmeıdi" dep qyrsyǵady. "Aldymen meni jaqsy kór, sosyn ózgerem" dep kúpinedi. Munysy eles qýý. Senbe.

Shynar ÁBILDA

"Adyrna" ulttyq portaly

Pikirler