پوليتسەي ءسوزى گرەك تىلىنەن اۋدارعاندا مەملەكەت، قالا دەگەن ماعىنانى بىلدىرەدى. كورشى رەسەي پاتشالىعىندا پوليتسيا سوناۋ 1719 جىلى پايدا بولعان دەيدى قازاقشا ۋيكيپەديا. ال 1917 جىلى ورىنبوردا 2-جالپىحالىقتىڭ سەزىنىڭ شەشىمىنە سايكەس الاش ميليتسياسى قۇرىلدى. قاتارعا 20-35 جاس ارالىعىندا قازاق جىگىتتەرى الىنىپ، ولار ەل ەرتەڭى ءۇشىن ۇلكەن ۇرىستارعا قاتىستى. ال ودان ارىگە كەتسەك، كەشەگى بوگەنباي، قابانباي، ەر قوساي سەكىلدى باتىرلار ەسكى زاماننىڭ ساقشىلارىنىڭ قىزمەتىن اتقارعانىن بىلەسىز...
پوليتسەي – وتكەندە ەكىباستۇزدا ويناپ ءجۇرىپ قۇم استىندا قالعان بالانى قۇتقارىپ قالعان تاحير قاسۋموۆ. پوليتسەي – وتكەندە كەرەكۋدە ءۇش بالاسى بار سۋيتسيد جاساماق بولعان ايەلدى قۇتقارىپ قالعان ايعوجين ەربول. پوليتسەي – قاراعاندى وڭىرىندە سۋعا باتىپ بارا جاتقان تۇرعىندى قۇتقارىپ قالعان داستان ازانباەۆ. پوليتسەي – ول وتكەندە عانا اتىراۋدا كوپىردەن سەكىرگەن قىزدى قۇتقارامىن دەپ قازا تاپقان شالقار اقىمعاليەۆ. پوليتسەي – ول جىلدىڭ باسىندا الماتىدا بولعان ورتتە 6 ادامنىڭ ءومىرىن ساقتاپ قالعان الىمقىدىر ادىلەت. پوليتسەي – ول پەتروپاۆلدا ءوزىن ءوزى ولتىرمەك بولعان 22 جاسار قىزدىڭ ءومىرىن اراشالاپ قالعان دەنيس كوموروۆ. پوليتسەي – ول تارازدا بولعان جانتۇرشىگەرلىك وقيعادا قوعام ءۇشىن جانىن قيعان عازيز بايتاسوۆ ەمەس پە؟!
بۇل دەگەنىڭىز قوعام - پوليتسەي، پوليتسەي دەگەنىمىز قوعام عوي. ەكى تاراپ تا بيلىكتىڭ اجىراماس بولشەگىندەي. بوگەنبايعا «حاندى قويا بەر، ءبىزدىڭ قاتارعا قوسىل» دەپ ايتۋ اقىلعا سىيار ما ەدى؟ سىيمايدى. ناۋرىزبايدىڭ ارقاسىنان جۇگىرىپ بارىپ تەبەر مە ەدىڭىز؟ مۇلدەم قيسىنسىز. وسى ەكى تاراپتى اجىراتىپ كورسەتىپ، بۇلىككە باستاپ، سىرتىمىزدان كۇلىپ وتىرعاندار جاۋىز ەمەي كىم؟! دۇكەنىڭىزدىڭ، التىن سارايىڭىزدىڭ تونالماۋى، بالالارىڭىزدىڭ مەكتەپكە، بالاباقشاعا ەسەن-ساۋ بارىپ كەلۋى، الاڭسىز ۇيقى، ءتىپتى اناۋ جەدەل-جاردەمنىڭ دە ۋاقىتىلى ۇيىڭىزگە جەتۋى وسى پوليتسەيلەردىڭ ەڭبەگى ەمەس پە؟!
ءوز باسىم قازاقستان پوليتسەيىن تاۋەلسىزدىكتىڭ ايقىن نىشانى، اجىراماس ءبىر بولىگى دەپ بىلەمىن. ءبارىمىز دە «پوليتسەي بولامىن» دەپ قيالداپ، ارمانداپ وستىك. بۇگىن بالالارىمىز، نەمەرەلەرىمىز سولاي دەپ ءجۇر. ەندەشە ءبىز نەگە اراندايمىز؟ فورما كيىپ، زاڭعا سايكەس مىندەتىن اتقارعانى ءۇشىن بىرەۋدىڭ قامقور اكەسىن، بىرەۋدىڭ جالعىز ءىنى-باۋىرىن، بىرەۋدىڭ جاپ-جاس بالاسىن جاعادان الىپ، باسىنا سەكىرگەنىمىز دۇرىس پا؟ اقساقالدى كوتەرىپ بارا جاتسا، ارانداپ قالماسىن دەگەنى. ايتپەسە الاقان جايىپ اللاسىنا جالبارىنىپ وتىرعان جەرىنەن كوتەرىپ كەتكەن جوق قوي. ۇيدە "بالاپان" كورىپ جاتاتىن بالاڭدى جۇلقىلاپ الىپ كەپسىڭ. باسىنا بۋتىلكا تيسە بولاشاعى نەشىك؟ شىقپا دەدى مە، شىقپا. شىقتىڭ ەكەن، شىرىلداما. جەكا سەكىلدى سەكا دا ۇيىنە قايتقىسى كەلمەيدى دەيسىز بە؟
ازامات بيتان
"ادىرنا" ۇلتتىق پورتالى
