ۇلىبريتانيا بيلىگى «رەسەي اسكەري ماشيناسىن» قولدادى دەگەن كۇدىككە ىلىنگەن تۇلعالار مەن ۇيىمدارعا قارسى جاڭا سانكتسيالار ەنگىزدى. وزبەكستاننىڭ Mvizion كومپانياسى دا سانكتسيا تىزىمىنە ەنگەن، دەپ حابارلايدى «ادىرنا» ۇلتتىق پورتالى.
ۇلىبريتانيا ۇكىمەتى «رەسەي سوعىس ماشيناسىن» جەتكىزىپ، قارجىلاندىردى دەپ ايىپتالعان جەكە تۇلعالار مەن كومپانيالارعا قارسى جاڭا سانكتسيالار پاكەتىن جاريالادى.
سانكتسيالىق تىزىمدەرگە قارۋ-جاراق وندىرۋمەن نەمەسە رەسەيگە قورعانىس ونىمدەرىن اكەلۋمەن بايلانىستى 46 جەكە جانە زاڭدى تۇلعا كىرەدى. ولاردىڭ قاتارىندا شەت مەملەكەتتەردەن، سونىڭ ىشىندە وزبەكستاننان 30-عا جۋىق كاسىپورىن بار.
«بۇگىنگى شارالار رەسەي پرەزيدەنتى ۆلاديمير ءپۋتيندى بەلارۋس، قىتاي، سەربيا، تۇركيا، بىرىككەن اراب امىرلىكتەرى جانە وزبەكستانداعى ءۇشىنشى تاراپ جەتكىزۋ تىزبەگى ارقىلى ءوز ارمياسىن جابدىقتاۋ مۇمكىندىگىنەن ايىرادى»، - دەلىنگەن حابارلامادا.
اتاپ ايتقاندا، «رەسەيگە قوسالقى بولشەكتەردى اكەلۋدە دەلدال بولعان» وزبەكستاندىق Mvizion كومپانياسىنا شەكتەۋلەر قويىلدى. Mvizion اقش-تىڭ سانكتسيالار تىزىمىنە قاراشا ايىندا ەندى. اقش ساۋدا مينيسترلىگىنىڭ مالىمەتىنشە، بۇل رەسەي قارۋلى كۇشتەرى ءۇشىن ۇشقىشسىز ۇشاقتاردى شىعارۋمەن بايلانىستى.
كاسىپورىندار مەن ۇيىمداردىڭ بىرىڭعاي مەملەكەتتىك تىزىلىمىنە سايكەس، Mvizion 2022 جىلدىڭ 14 ماۋسىمىندا 1 ميلليون سۋم جارعىلىق كاپيتالمەن تىركەلگەن. نەگىزگى قىزمەت ءتۇرى – «ەلەكتروندىق جانە تەلەكوممۋنيكاتسيالىق جابدىقتاردىڭ جانە وعان قوسالقى بولشەكتەردىڭ كوتەرمە ساۋداسى».
ەۋرووداقتىڭ سانكتسيالار جونىندەگى ارنايى وكىلى دەۆيد و’سالليۆان وزبەكستاننىڭ رەسەي فەدەراتسياسىنا سانكتسيالانعان ەۋروپالىق تاۋارلاردىڭ رەەكسپورتىنا قالاي قارسى تۇرعانى جانە ەل ەكونوميكاسى ءۇشىن ءارتاراپتاندىرۋدىڭ نەلىكتەن ماڭىزدى ەكەندىگى تۋرالى ايتتى.
«ءبىز وزبەكستاننىڭ ءداستۇرلى ساۋدا بايلانىسىن بۇزۋعا ۇمتىلمايمىز»، - دەدى ول Gazeta.uz سايتىنا بەرگەن سۇحباتىندا.
«ادىرنا» ۇلتتىق پورتالى
