رەسەي اسكەرى 7 ناۋرىزعا قاراعان ءتۇنى ۋكراينا اۋماعىنا جاپپاي سوققى جاسادى، دەپ حابارلايدى "ادىرنا" ۇلتتىق پورتالى DW سايتىنا سىلتەپ.
سونىڭ سالدارىنان حاركوۆ قالاسىندا كەمىندە 11 ادام قازا تاپتى، ولاردىڭ ىشىندە ەكى بالا بار.
ۋكراينانىڭ توتەنشە جاعدايلار قىزمەتىنىڭ مالىمەتىنشە، بالليستيكالىق زىمىران حاركوۆتىڭ كيەۆ اۋدانىنداعى بەس قاباتتى تۇرعىن ۇيگە تۇسكەن. قازا تاپقانداردىڭ دەنەسىن قۇتقارۋشىلار ءۇيىندى استىنان الىپ شىققان. قازىرگى ۋاقىتتا شامامەن 300 شارشى مەتر اۋماقتا ىزدەستىرۋ-قۇتقارۋ جۇمىستارى جۇرگىزىلىپ جاتىر. الدىن الا دەرەك بويىنشا 10 ادام جارالانعان، ولاردىڭ ىشىندە بالالار دا بار.
حاركوۆ وبلىسىنداعى چۋگۋەۆ قالاسىندا دا درون شابۋىلى تىركەلگەن. قالا اكىمى گالينا ميناەۆانىڭ ايتۋىنشا، ۇشقىشسىز اپپارات جەكە تۇرعىن ۇيگە تۇسكەن. الدىن الا مالىمەت بويىنشا، ەكى تۇرعىن جاراقات العان.
سونىمەن قاتار دنەپروپەتروۆسك وبلىسىندا جاسالعان شابۋىلدار سالدارىنان ءبىر ادام قازا تاۋىپ، ءبىر ايەل جارالانعان. ايماق بيلىگىنىڭ دەرەگىنە سايكەس، وبلىستىڭ ءۇش اۋدانىنا دروندار مەن ارتيللەريا ارقىلى شامامەن 20 سوققى جاسالعان.
ال زاپوروجە قالاسىندا تۇنگى شابۋىل كەزىندە نارەستە جاراقات العان. وبلىس باسشىسى يۆان فەدوروۆ ءبىر تاۋلىكتە ءوڭىردىڭ 41 ەلدى مەكەنىنە 760 سوققى جاسالعانىن مالىمدەدى.
ۋكراينا پرەزيدەنتى ۆلاديمير زەلەنسكي قۇتقارۋ قىزمەتتەرى زارداپ شەككەن ايماقتاردا جۇمىسىن جالعاستىرىپ جاتقانىن مالىمدەدى.
