تانىمال وپەرا ءانشىسى پلاسيدو دومينگو ديماش قۇدايبەرگەنگە دۋەت جازۋدى ۇسىندى، دەپ حابارلايدى "ادىرنا" ءتىلشىسى Tengri Life-قا سىلتەپ.
الەمگە ايگىلى يسپاندىق وپەرا ءانشىسى، 82 جاستاعى ديريجەر پلاسيدو دومينگو قازاقستاندىق ءانشى ديماش قۇدايبەرگەنگە دۋەت شىرقاۋدى ۇسىندى.
"نەمەرەم ءسىزدى ماعان اشتى. ول ءسىزدىڭ جازبالارىڭىزدى جىبەردى. ول سىزگە وتە قاتتى قىزىعادى. ءسىزدى جۇلدىز رەتىندە تانيدى. نەمەرەم قازىر نەبارى 18 جاستا ءارى بارابانشى. ول ءسىزدى YouTube-تان كوردى", - دەدى ديريجەر.
وپەرا ءانشىسى دومينگو ديماشتىڭ تالانتىنا تاڭدانىپ، تاق قالاتىنىن جاسىرمادى. ديماشتىڭ التى وكتاۆادا دىبىستى انىق ءارى ەركىن الاتىنىن اتاپ ءوتتى.
ءوز كەزەگىندە قازاقستاندىق ءانشى ديماش قۇدايبەرگەن دە وپەرا ءانشىسى تۋرالى ويىن ايتتى.
"سىزبەن كەزدەسۋ مەن ءۇشىن ۇلكەن مارتەبە. بەس جاسىمدا ۇيدە ءسىزدىڭ كونتسەرتىڭىزدىڭ تاسپاسى بولعان. مەن ءسىز ءۇشىن مۋزىكاعا كەلدىم", - دەدى جۇلدىز.
ونەر ادامى ديماشقا شىعارماشىلىق ۇسىنىسىن دا ايتتى.
ء"بىز دۋەت جاساۋىمىز كەرەك. مەن 20 جاسىمدا ءوز داۋىسىممەن ءان ايتا الاتىن ەدىم. ەندى ماعان تەنور ءۇشىن تەسسيتۋرا جەتىسپەيدى. بىراق مەنىڭ ويىمشا، بۇل ءسىز ءۇشىن قيىن بولمايدى. ءبىز ادەمى دۋەت جازامىز. ىڭعايلى بولسا ەرتەڭ جاتتىعۋ جاسايىق",-دەدى 82 جاستاعى ماەسترو.
