قازاقستاندىق ءانشى ديماش قۇدايبەرگەن قىتايداعى جاڭا جىل مەرەكەسىندە ءان ايتتى، دەپ حابارلايدى "ادىرنا" ءتىلشىسى dimashnews.com-عا سىلتەپ.
2024 جىلدىڭ 8 اقپانىندا جەرلەسىمىز قىتاي كۇنتىزبەسى بويىنشا جاڭا جىل قارساڭىنا ارنالعان جوبالاردا بىرنەشە ءاندى ورىنداپ، قىتاي تەلەارنالارىندا ونەر كورسەتتى.
CCTV-3 ارناسىنىڭ مەرەكەلىك باعدارلاماسىندا ديماش 2024 جىلعى كوكتەم فەستيۆالىنىڭ گالا-كونتسەرتىنە ارنالعان قازاق جانە قىتاي تىلدەرىندە «ۇمىتىلماس كۇن» جانە «Give me your love»اتتى شىعارمالارىمەن كوپشىلىكتى ءتانتى ەتتى.
ال 2024 Liaoning TV Spring Festival گالا-كونتسەرتىندە ديماش قۇدايبەرگەن ايگىلى پيانيست لانگ لانگتىڭ سۇيەمەلدەۋىمەن «Thousands of Miles, a Common Dream»، ياعني،«مىڭداعان شاقىرىمعا ءبىر ارمان» اتتى ءاندى شىرقادى.
ءانشى تايۆاندىق ونەرپاز ريچي رەنمەن بىرگە «Flowers Bloom in Spring» كومپوزيتسياسىن دا كەرەمەت ورىنداپ شىقتى.
ەسكە سالا كەتەيىك، 31 جەلتوقساننان 1 قاڭتارعا قاراعان ءتۇنى جاڭا جىلدىق كەشتە ديماش قۇدايبەرگەن قر ءانۇرانىن اقوردادا سيمفونيالىق وركەستردىڭ سۇيەمەلدەۋىمەن ورىنداپ شىقتى.
