بۇگىن، 9 جەلتوقساندا قاراعاندى وبلىسىنداعى كوستەنكو اتىنداعى شاحتاداعى جارىلىسقا ۇلاسقان ءورتتىڭ سەبەپتەرىن تەكسەرۋ جونىندەگى ۇكىمەت كوميسسياسىنىڭ قورىتىندى وتىرىسى ءوتتى. بۇل تۋرالى توتەنشە جاعدايلار مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
«قازاقستاننىڭ، قيىر جانە تاياۋ شەتەلدەردىڭ عىلىمي-زەرتتەۋ جانە ساراپتامالىق ۇيىمدارىن تارتا وتىرىپ، تەحنيكالىق قۇجاتتامانى، ايعاقتاردى جانە باسقا ماتەريالداردى زەردەلەۋ بويىنشا ەگجەي-تەگجەيلى جۇمىستار جۇرگىزىلدى. ناتيجەسىندە، ءورت جانە مەتان-اۋا قوسپاسىنىڭ ودان ءارى جارىلۋى قىرعىش كونۆەيەر ەلەمەنتتەرىنىڭ سوققىسى مەن ۇيكەلىسىنەن پايدا بولعان مەحانيكالىق ۇشقىننان گازدىڭ (مەتاننىڭ) تۇتانۋىنىڭ بولعانى انىقتالدى. گازدىڭ ءوزى استىڭعى توسەمەدەن بولىنگەن»، – دەپ جازىلعان حابارلامادا.
كوميسسيا ونەركاسىپتىك قاۋىپسىزدىك تالاپتارىنىڭ بۇزىلۋشىلىقتارىن دا انىقتادى. اتاپ ايتقاندا، جۇمىستىڭ تولىققاندى ۇيىمداستىرىلماۋى جانە قاۋىپتى وندىرىستىك فاكتورلارعا قاجەتتى وندىرىستىك باقىلاۋدىڭ جوقتىعى اتاپ ءوتىلدى. ولاردىڭ قاتارىنا تۇراقتى شاحتالاردا شاڭ مەن جارىلىسقا قارسى شارالاردى ورىنداۋ دا جاتادى.
كوميسسيا جۇمىسىنىڭ قورىتىندىسى بويىنشا جۇمىس بەرۋشىنىڭ كىناسى 100% انىقتالىپ، جۇمىستى قاۋىپسىز ورىنداۋ تالاپتارىن بۇزعان 19 جاۋاپتى تۇلعا انىقتالدى.
ەڭبەك زاڭناماسىنا سايكەس تەرگەۋ ماتەريالدارى قۇقىق قورعاۋ ورگاندارىنا بەرىلدى.
