حاميت ەسامان 1986 جىلى 16 تامىزدا جامبىل وبلىسى، ت.رىسقۇلوۆ اۋدانى، تەرەڭوزەك اۋىلىندا دۇنيەگە كەلگەن. تاراز پەداگوگيكالىق ينستيتۋتىنىڭ تۇلەگى. 2008 جىلى «جالىن» باسپاسىنان «اعاشتىڭ ءبۇرى»، 2013 جىلى «جازۋشى» باسپاسىنان «قاراشا حاتتارى» اتتى ولەڭدەر جيناعى جارىق كورگەن. حالىقارالىق «شابىت» شىعارماشىل جاستار فەستيۆالىنىڭ «ۇزدىك ادەبي شىعارما» (پوەزيا) اتالىمى بويىنشا ەكىنشى ورىن يەگەرى. ەندەشە نازارلارىڭىزعا جامبىلدىق جاس اقىننىڭ جەڭىمپاز بولعان ءبىر ولەڭىن ۇسىنامىز.
ايتىلماعان سىر
جازايىن ءبىر جاڭبىرلاتىپ ولەڭدى،
قاي تەڭىزگە قايىرلاتتىم كەمەمدى.
ءوزىمدى ءالى تۇسىنبەگەن جايىم بار،
تۇسىندىرەم دەپ جۇرگەندە الەمدى.
كۇللى الەمدى تۇسىندىرگىم كەلەتىن،
كوڭىلىمدە كۇمبىرلەيتىن كونە ءتۇن.
مىنا مەنىڭ جۇرەگىمنىڭ جۇلدىزى،
قيسىنى جوق قيالىما سەنەتىن.
تامىر باسىپ تاعدىر جايلى تولعاپ ەم،
جۇرەگىمە جۇلدىز ءتۇستى تامدى ولەڭ.
قاي ولەڭدى وقىمادىم مەن بەيباق،
قاي اقىنمەن اۋىرمادىم سوندا مەن.
گۇلدەردى اڭساپ قاۋىزدارى اشىلعان،
تالاي داۋرەن ۇشىپ كەتتى باسىمنان.
جۇرەگىمنەن باستالعانىم نە كەرەك،
جاراتىلماعان سوڭ كوركەم جاسىننان.
دۇشپان تابا قىلىپ...كەيدە دوس كۇلگەن،
مەيلى ونىڭ ءبارىن كەيىن كەشتىم مەن.
بىراق بۇگىن وقي الماي ءبىر ولەڭ،
اۋىرا الماي ءجۇرمىن تاعى ەشكىممەن.
