Hamıt Esaman 1986 jyly 16 tamyzda Jambyl oblysy, T.Rysqulov aýdany, Tereńózek aýylynda dúnıege kelgen. Taraz pedagogıkalyq ınstıtýtynyń túlegi. 2008 jyly «Jalyn» baspasynan «Aǵashtyń búri», 2013 jyly «Jazýshy» baspasynan «Qarasha hattary» atty óleńder jınaǵy jaryq kórgen. Halyqaralyq «Shabyt» shyǵarmashyl jastar festıvaliniń «Úzdik ádebı shyǵarma» (Poezııa) atalymy boıynsha ekinshi oryn ıegeri. Endeshe nazarlaryńyzǵa Jambyldyq jas aqynnyń jeńimpaz bolǵan bir óleńin usynamyz.
Aıtylmaǵan syr
Jazaıyn bir jańbyrlatyp óleńdi,
Qaı teńizge qaıyrlattym kememdi.
Ózimdi áli túsinbegen jaıym bar,
Túsindirem dep júrgende álemdi.
Kúlli álemdi túsindirgim keletin,
Kóńilimde kúmbirleıtin kóne tún.
Myna meniń júregimniń juldyzy,
Qısyny joq qııalyma senetin.
Tamyr basyp taǵdyr jaıly tolǵap em,
Júregime juldyz tústi tamdy óleń.
Qaı óleńdi oqymadym men beıbaq,
Qaı aqynmen aýyrmadym sonda men.
Gúlderdi ańsap qaýyzdary ashylǵan,
Talaı dáýren ushyp ketti basymnan.
Júregimnen bastalǵanym ne kerek,
Jaratylmaǵan soń kórkem jasynnan.
Dushpan taba qylyp...keıde dos kúlgen,
Meıli onyń bárin keıin keshtim men.
Biraq búgin oqı almaı bir óleń,
Aýyra almaı júrmin taǵy eshkimmen.
