قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين جۋرناليست، ءماجىلىس دەپۋتاتى نارتاي ارالبايۇلىنىڭ يۋتۋب-ارناسىنا سۇحبات بەرىپ، ەلىمىزدەگى بىرقاتار ماسەلەلەردى ءسوز ەتتى. سونىڭ ىشىندە جاستار اراسىندا سينتەتيكالىق ەسىرتكى قولدانىسىنىڭ بەلەڭ الۋى مەن ناشاقورلىق سىندى پروبلەماعا قاتىستى ءوزىنىڭ ساياسي كوزقاراسىن ءبىلدىردى، دەپ حابارلايدى "ادىرنا" ۇلتتىق پورتالى.
سۇحبات بارىسىندا ەرلان تىنىمبايۇلى سينتەتيكالىق ەسىرتكىنىڭ زيانىن ايتىپ، "جاستار كەڭەسىنىڭ" ماقسات-مىندەتتەرىنە توقتالدى.
- بۇل قازىرگى زامانداعى ەڭ قاۋىپتى قاتەرلەرىنىڭ ءبىرى. سينتەتيكالىق ەسىرتكى ءبىزدىڭ قوعامدا عانا ەمەس، كوپتەگەن ەلدەردە جاستاردى ۋلاپ جاتىر. سوندىقتان پرەزيدەنت وتكەن جىلعى جولداۋىندا سينتەتيكالىق ەسىرتكىمەن كۇرەستى مەملەكەتتىڭ باستى ماقساتتارىنىڭ ءبىرى دەپ بەلگىلەدى. قۇزىرلى ورگانداردىڭ جۇمىسىنا قاراماستان سينتەتيكالىق ەسىرتكى جىلدان-جىلعا كەڭىنەن تارالىپ بارا جاتىر. ونىڭ قاۋىپتىلىگى نەدە؟ جاستاردى، اسىرەسە بالالاردى دا وزىنە تارتادى. مەكتەپ جاسىنداعى بالالاردىڭ دا مۇنداي ەسىرتكىنى قابىلداعان جاعدايلارى كەزدەسىپ جاتادى. ونى بىراق ەسىرتكى دەپ قابىلدامايدى، ءدارى-دارمەكتىڭ ءبىر فورماسى سياقتى تۇسىنەدى... ونى كوبى كۇش-قۋات بەرەتىن ءدارى-دارمەك سەكىلدى قابىلدايدى. قالاي دەپ اتاساق تا، بۇل - ۋلى، زياندى ەسىرتكى، - دەدى ەرلان قارين.
سونىمەن قاتار ول زياندى ادەتتەرگە باستايتىن ونىمدەرمەن كۇرەسۋگە قاسىم-جومارت توقاەۆتىڭ مەملەكەت دەڭگەيىندە ماڭىز تانىتىپ وتىرعانىن ايتىپ ءوتتى. ەلىمىزدە وسى ۋاقىتقا دەيىن ەسىرتكىمەن كۇرەسۋگە باعىتتالعان ناقتى جوسپاردىڭ قولعا الىنباي كەلگەنىن تىلگە تيەك ەتتى.
- ارينە، جۇمىستار اتقارىلىپ جاتىر. بىراق بارلىق مەملەكەتتىك ورگانداردى جۇمىلدىراتىنداي كەشەندى جوسپار سوڭعى رەت 2016 جىلى قابىلدانعان بولاتىن. سوندىقتان مەملەكەت باسشىسى بىزگە ەسىرتكى بيزنەسىمەن كۇرەستى جۇيەلەيتىن جوسپار قۇرۋعا قاتىستى تاپسىرما بەرىلدى. سونىڭ نەگىزىندە "جاستار كەڭەسى" قۇرىلدى. مينيسترلىك وكىلدەرىن جيناپ، "جاستار كەڭەسىنىڭ" الاڭىنىندا وسى تاقىرىپتى العاش رەت كوتەردىك. كەشەندى جوسپاردىڭ دايىندالۋىن قاداعالاۋعا الدىق، - دەدى ساياساتكەر.
مۇنىمەن قوسا، قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين "جاستار كەڭەسىنىڭ" جۇمىسى قالاي ءجۇرىپ جاتقانىن ءسوز ەتتى. سينتەتيكالىق ەسىرتكى مەن ناشاقورلىققا قارسى قۇرىلعان كەشەندى جوسپاردىڭ ساياسي تەتىكتەرى مەن قوعامدىق ءمان-ماڭىزىن تالقىلادى.
"ادىرنا" ۇلتتىق پورتالى
