تاراز. قازاقپارات - تارازدىڭ «وتباسىلىق سوت» پيلوتتىق جوباسى اياسىندا دوستىق ۇيىندە «وتباسى ورتالىعى» اشىلدى، دەپ حابارلايدى قازاقپارات ءتىلشىسى. «وتباسى ورتالىعى» قازاقستان حالقى اسسامبلەياسى جانە وبلىستىق سوتتىڭ ۇيىمداستىرۋىمەن اشىلىپ وتىر. مەدياتسيا كابينەتىندە وسىنداي ورتالىقتى قۇرۋدىڭ باستى ماقساتى - ارازداسقان وتباسىلاردى تاتۋلاستىرۋ، جانۇياداعى جانجالداردى رەتتەۋ بويىنشا قىزمەتتەر كەشەنىن كورسەتۋ. ورتالىقتىڭ اشىلۋ سالتاناتىنا وبلىستىق سوت القاسىنىڭ توراعاسى جومارت رۇستەمبەكوۆ، وبلىستىق اسسامبلەيا توراعاسىنىڭ ورىنباسارى، حاتشىلىق مەڭگەرۋشىسى مارجان قوجاەۆا قاتىستى. جومارت رۇستەمبەكوۆ وبلىستىق قازاقستان حالقى اسسامبلەياسىنا وسىنداي ورتالىقتى قۇرۋعا مۇمكىندىك بەرىپ، بىرلەسكەن جۇمىس ۇشىن العىسىن ءبىلدىردى. «بۇدان ءارى ورتالىقتا وتباسى-نەكە داۋلارى بويىنشا سوتقا دەيىن جانە سوتتان تىس رەتتەۋ ينستيتۋتىن دامىتۋ شارالارى جۇرگىزىلەدى. الدا مۇنداي ءىس-شارالارعا بىتىمگەر سۋديالار، مەدياتورلار، پسيحولوگتار مەن الەۋمەتتانۋشىلار قاتىسادى. ولاردىڭ مىندەتى جانجالداسقان ەرلى-زايىپتىلاردى تاتۋلاستىرۋ جانە اجىراسۋ سانىن مەيلىنشە ازايتۋ بولىپ تابىلادى»، - دەيدى ج.رۇستەمبەكوۆ. سونىمەن قاتار ءىس-شارا بارىسىندا جامبىل وبلىسى ادىلەت دەپارتامەنتىنىڭ وكىلى ءلاززات ابىشەۆا «وتباسىلىق سوت» جاڭا جوباسىمەن تانىستىردى. ول احات ورگاندارىنا ءوتىنىش بىلدىرگەن جاس جۇپتارعا تەگىن ترەنينگ، كۋرستاردى ۇيىمداستىرۋ، ەرلى-زايىپتىلاردىڭ، اتا-انالاردىڭ جەكە، مۇلىكتىك قۇقىقتارى مەن مىندەتتەرىنە، اليمەنتتىك مىندەتتەمەلەرگە، بالا قۇقىقتارىنا بايلانىستى قۇقىقتىق كەڭەس بەرۋ ماسەلەلەرى تۋرالى ايتىپ ءوتتى.
دەرەككوز: https://www.inform.kz/kz/tarazda-erli-zayyptylardy-tatulastyratyn-ortalyk-ashyldy_a3535103
