نازارباەۆ ۋنيۆەرسيتەتى ەرەكشە مارتەبەسىنەن ايىرىلا ما؟ بۇل سۇراققا ۇكىمەتتەگى بريفينگ بارىسىندا عىلىم جانە جوعارى ءبىلىم ءمينيسترى ساياسات نۇربەك جاۋاپ بەردى، دەپ حابارلايدى «ادىرنا» ۇلتتىق پورتالى.
مينيستر اتاپ وتكەندەي، ۋنيۆەرسيتەتتىڭ مارتەبەسى جەكە زاڭمەن ناقتى بەكىتىلگەن، مينيسترلىك ونى جويۋعا نەمەسە وزگەرتۋگە نيەتتى ەمەس.
«سونىمەن بىرگە قازىر وزدەرىڭىز بىلەتىندەي، زاڭعا بەلگىلى ءبىر وزگەرىستەر ەنگىزىلدى، پرەمەر-مينيستر باسقارعان قامقورشىلىق كەڭەس پەن جوعارى قامقورشىلىق كەڭەس قۇرىلدى. ۋنيۆەرسيتەتتىڭ قارجىلىق بولىگىن جاقسارتۋ ءۇشىن دە، عىلىمي-زەرتتەۋ الەۋەتىن كۇشەيتۋ ءۇشىن دە بەلگىلى شارالار قابىلداناتىن بولادى. سوندىقتان تۇزەتۋ شارالارى مىندەتتى تۇردە بولادى. بىراق، جالپى، ءبىز بۇل وقۋ ورنىنىڭ مارتەبەسى مەن باعىتىن وزگەرتپەيمىز»، – دەيدى ساياسات نۇربەك.
ەستەرىڭىزگە سالا كەتەيىك، شىلدە ايىندا تۇڭعىش پرەزيدەنت نۇرسۇلتان نازارباەۆ دەربەس ءبىلىم بەرۋ ۇيىمدارىنىڭ جوعارى قامقورشىلىق كەڭەسىنىڭ باسشىسى مارتەبەسىنەن ايىرىلدى. ال جاقىندا قازاقستاندىقتار نازارباەۆ ۋنيۆەرسيتەتىن قارجىلاندىرۋعا ىقپال ەتە الاتىنى بەلگىلى بولدى.
«ادىرنا» ۇلتتىق پورتالى
