قازاق قوعامىندا قازىرگى تاڭدا وسى سۇراق ءجيى قويىلىپ جۇرگەنى جاسىرىن ەمەس. حالقىمىزدا «وتان قادىرىنە جەتپەگەن – ءوز قادىرىنە جەتپەيدى» دەگەن اتالى ءسوز بار. وتاندى ءسۇيۋ – يماننان ەكەنىن ءبىزدىڭ اتا-بابامىز بىزگە ۇعىندىرىپ كەتكەنىن تاريحتان بىلەمىز. يسلام ءدىنىنىڭ بارلىق پارىزىن ورىنداي ءجۇرىپ, ەلىنە جاۋ شاپقاندا، وتانىنىڭ شەكاراسىندا تۇرىپ, قورعاعان سول باتىر بابالاردىڭ رۋحىنان ءنار العان ءبىزدىڭ تەكتىلىگىمىز تۋعان جەردى, ەلدى شىنايى سۇيۋگە تۇرتكى بولسا كەرەك-ءتى.
قازىرگى ءدىني احۋال ۋشىعىپ تۇرعان ساتتە ءدىن اتىن جامىلعان كەيبىر توپ وكىلدەرىنىڭ وتانىنا دەگەن ءسۇيىسپەنشىلىگى مەن ونى قورعاۋعا دەگەن قۇلقى مۇلدە جوق دەپ پايىم جاساپ جاتامىز. مۇنداي پىكىرلەردىڭ قالىپتاسۋىنا دا ءتۇرلى فاكتورلار اسەر ەتۋى مۇمكىن. وسى كوتەرىلگەن تاقىرىپ تۋراسىندا يمام قوندىباي قاجى اكپاروۆ ءوز پىكىرىن بىلدىرگەن بولاتىن.
«وتان – ءبىزدىڭ ورتاق شاڭىراعىمىز. ونى قورعاپ, ساقتاۋدى ادامزاتتىڭ اسىلى بولعان پايعامبارىمىز دا ۇرپاققا اماناتتاي بىلگەن. يسلام ءدىنى قاشاندا وتاندى سۇيۋگە, ونى قادىرلەۋگە نازار اۋدارعان. پايعامبارىمىز: «شەكارانى, وتاندى قورعاۋ ءۇشىن ءبىر كۇن, ءبىر ءتۇن كۇزەتتە تۇرۋ, ءبىر اي ءناپىل ورازا ۇستاپ, تۇندە ناماز وقۋدان قايىرلى, – دەپتى. يسلامدا بەس نارسەنى – وتانىڭدى, ءدىنىڭدى, ۇياتىڭدى, جانىڭدى, دۇنيەڭدى قىزعىشتاي قورعاۋ پارىز ەتىلەدى. وسىنىڭ ۇشار باسىندا ەڭ اۋەلى وتان تۇر. نەگە؟ ويتكەنى وتانىڭا شىنايى جانىڭ اشىپ, قورعاي الماساڭ, قالعان تورتەۋىنەن ايىرىلىپ قالۋ وپ-وڭاي. ءبىز وسىنى ۇعىنۋىمىز كەرەك. بۇگىندە ءدىن جولىنا بەت بۇرعاندار اراسىندا ەلىمىزدى قورعاۋعا ەنجارلىق تانىتاتىندار كوپ دەپ ايىپ تاعىپ جاتامىز. بالكىم, بار شىعار, بىراق بەس ساۋساق بىردەي ەمەستىگىن دە ەسكە سالعان ءجون. وتاندى ءسۇيۋ – وتباسىنان باستالادى. شاڭىراقتاعى اكە ۇلىن ءوز تۋعان جەرىن, كىندىك قانى تامعان ەلىن ءسۇيىپ, قادىرلەۋدى جاستايىنان ساناسىنا سىڭىرسە, ەندى ءوسىپ كەلە جاتقان «جاس شىبىق» اكە اقىلىنان الشاق كەتپەيدى»، – دەدى ءدىن وكىلى.
وتانعا دەگەن ماحاببات, سۇيىسپەنشىلىك ادام تالعامايتىنى شىندىق. پايعامبار دا، پاتشا دا، حالىق تا وتانىن ءسۇيىپ, قۇرمەتتەۋى پارىز. ويتكەنى بارلىعىمىزدىڭ بار اسىل قۇندىلىعىمىز ول – وتانىمىز. وتاننىڭ قادىرىنە جەتپەگەن ۇلتتاردىڭ تاعدىرى نە بولعانىن ارعى-بەرگى تاريحتان جاقسى بىلەمىز.
اتا-بابادان ۇرپاققا ميراس بولعان وتانىمىزدى قورعاۋ – ۇلى پارىز. ءدىني جاماعاتتىڭ اراسىندا دا ءوز ۇلتىنا, وتانىنا دەگەن سۇيىسپەنشىلىك قالىپتاسقان ازاماتتار بارىنا ءشۇبا كەلتىرۋگە بولماس. وتاندى قورعاۋ دىنگە, ۇلتقا بولىنۋگە بولمايتىنىن ەسكەرگەن ءجون, اعايىن!
«ادىرنا» ۇلتتىق پورتالى
