Qazaq qoǵamynda qazirgi tańda osy suraq jıi qoıylyp júrgeni jasyryn emes. Halqymyzda «Otan qadirine jetpegen – óz qadirine jetpeıdi» degen ataly sóz bar. Otandy súıý – ımannan ekenin bizdiń ata-babamyz bizge uǵyndyryp ketkenin tarıhtan bilemiz. Islam dininiń barlyq paryzyn oryndaı júrip, eline jaý shapqanda, Otanynyń shekarasynda turyp, qorǵaǵan sol batyr babalardyń rýhynan nár alǵan bizdiń tektiligimiz týǵan jerdi, eldi shynaıy súıýge túrtki bolsa kerek-ti.
Qazirgi dinı ahýal ýshyǵyp turǵan sátte din atyn jamylǵan keıbir top ókilderiniń Otanyna degen súıispenshiligi men ony qorǵaýǵa degen qulqy múlde joq dep paıym jasap jatamyz. Mundaı pikirlerdiń qalyptasýyna da túrli faktorlar áser etýi múmkin. Osy kóterilgen taqyryp týrasynda ımam Qondybaı qajy Akparov óz pikirin bildirgen bolatyn.
«Otan – bizdiń ortaq shańyraǵymyz. Ony qorǵap, saqtaýdy adamzattyń asyly bolǵan Paıǵambarymyz da urpaqqa amanattaı bilgen. Islam dini qashanda Otandy súıýge, ony qadirleýge nazar aýdarǵan. Paıǵambarymyz: «Shekarany, Otandy qorǵaý úshin bir kún, bir tún kúzette turý, bir aı nápil oraza ustap, túnde namaz oqýdan qaıyrly, – depti. Islamda bes nárseni – Otanyńdy, dinińdi, uıatyńdy, janyńdy, dúnıeńdi qyzǵyshtaı qorǵaý paryz etiledi. Osynyń ushar basynda eń áýeli Otan tur. Nege? Óıtkeni Otanyńa shynaıy janyń ashyp, qorǵaı almasań, qalǵan tórteýinen aıyrylyp qalý op-ońaı. Biz osyny uǵynýymyz kerek. Búginde din jolyna bet burǵandar arasynda elimizdi qorǵaýǵa enjarlyq tanytatyndar kóp dep aıyp taǵyp jatamyz. Bálkim, bar shyǵar, biraq bes saýsaq birdeı emestigin de eske salǵan jón. Otandy súıý – otbasynan bastalady. Shańyraqtaǵy áke ulyn óz týǵan jerin, kindik qany tamǵan elin súıip, qadirleýdi jastaıynan sanasyna sińirse, endi ósip kele jatqan «jas shybyq» áke aqylynan alshaq ketpeıdi», – dedi din ókili.
Otanǵa degen mahabbat, súıispenshilik adam talǵamaıtyny shyndyq. Paıǵambar da, patsha da, halyq ta Otanyn súıip, qurmetteýi paryz. Óıtkeni barlyǵymyzdyń bar asyl qundylyǵymyz ol – Otanymyz. Otannyń qadirine jetpegen ulttardyń taǵdyry ne bolǵanyn arǵy-bergi tarıhtan jaqsy bilemiz.
Ata-babadan urpaqqa mıras bolǵan Otanymyzdy qorǵaý – uly paryz. Dinı jamaǵattyń arasynda da óz ultyna, Otanyna degen súıispenshilik qalyptasqan azamattar baryna shúbá keltirýge bolmas. Otandy qorǵaý dinge, ultqa bólinýge bolmaıtynyn eskergen jón, aǵaıyn!
«Adyrna» ulttyq portaly
