وسكەمەندەگى قوعامدىق كولىكتەردە ەلەكتروندى بيلەتتەندىرۋ جۇيەسى بيىلدان باستاپ ەنگىزىلەتىن بولدى. بۇگىنگى كۇنى ەكىنشى مارتە كونكۋرس جاريالانىپ، جوبانى جۇزەگە اسىرۋعا نيەتتى كومپانيالار انىقتالۋدا.
ەستەرىڭىزگە سالا كەتەيىك، العاشقى كونكۋرس بىلتىرعى جەلتوقسان ايىنا بەلگىلەنگەن، الايدا وتىنىمدەردىڭ جوقتىعىنان ول وتپەگەن. ەكىنشىسى بيىل مامىردىڭ سوڭىندا جاريالاندى. شقو بويىنشا مەملەكەتتىك-جەكەمەنشىك ارىپتەستىك ايماقتىق ورتالىعىنىڭ باسقارما توراعاسى شاكارىم بۇقتۇعۇتوۆتىڭ ايتۋىنشا، كونكۋرسقا وتاندىق كاسىپورىنداردان بولەك رەسەي مەن بەلارۋستىڭ كومپانيالارى دا قىزىعۋشىلىق تانىتقان. مەملەكەتتىك-جەكەمەنشىك سەرىكتەستىك اياسىندا ىسكە اسىرىلاتىن جوبانىڭ جالپى قۇنى 1 ملرد. تەڭگەنىڭ ۇستىندە. بۇل شىعىننىڭ 70 پايىزى ينۆەستورلاردىڭ قارجىسى ەسەبىنەن، قالعانى وبلىس بيۋدجەتىنەن وتەلەدى.
– ەلەكتروندى بيلەتتەندىرۋ جۇيەسىن ەنگىزۋ – تابىستىڭ كوزى. ايتالىق، الماتىدا وسى جۇيەنىڭ كومەگىمەن تاسىمالداۋشىلاردىڭ كىرىسى ءتورت ەسەگە وسكەن. بىزدە دە سولاي بولۋى ءتيىس. ناتيجەسىندە قىزمەت ساپاسى ارتا تۇسەدى، ‒ دەپ ءتۇسىندىردى شىعىس قازاقستان وبلىسىنىڭ اكىمى دانيال احمەتوۆ.
مامانداردىڭ ايتۋىنشا، بۇل جۇيە الدىمەن وبلىس ورتالىعىنداعى 28 ترامۆايعا ورناتىلماق، سودان كەيىن قالا ىشىندە جولاۋشىلار تاسىمالدايتىن 558 اۆتوبۋستا ىسكە قوسىلادى. جولاۋشىلار جول اقىسىن تولەم كارتاسى ارقىلى تولەيدى. وسكەمەن قالاسى ءۇشىن 100 مىڭنان استام تولەم كارتاسىن شىعارۋ كوزدەلىپ وتىر.
ايتا كەتەيىك، جاڭا جۇيەنىڭ ەنگىزىلۋىمەن بيلەت باعاسى قىمباتتامايدى جانە كوندۋكتورلار جۇمىسسىز قالمايدى.
قۋان سەيىت
