2018-2019 وقۋ جىلىندا «جۇزدەن جۇيرىك شىققان» حالىقارالىق زياتكەرلىك وليمپيادالار مەن سپورتتىق جارىستاردىڭ، ءدۇبىرلى ونەر دودالارىنىڭ جەڭىمپازدارى مەن جۇلدەگەرلەرىن القالاۋ شاراسى ءوتتى وسكەمەندە. بۇل سالتاناتتى جيىنعا شىعىس قازاقستان وبلىسىنىڭ اكىمى دانيال احمەتوۆ ارنايى قاتىستى.
كەزدەسۋ باستالماي تۇرىپ ايماق باسشىسى دانيال احمەتوۆ وقۋشىلاردىڭ عىلىمي جوبالارى مەن ونەرباتىستارى نازارعا ۇسىنىلعان كورمەنى ارالاپ كوردى. كورمەدە نە جوق دەيسىز؟ 3D مودەلدەۋدەن باستاپ روبوتتىق تەحنيكانىڭ الاۋان ءتۇرى، حيميا مەن ينجەنەريانىڭ جەتىستىكتەرى، كۇن باتارەياسىمەن ۇشاتىن ۇشاق، اۆتوماتتاندىرىلعان اۋەجاي، ءتىپتى شولپان پلانەتاسىنداعى بۇلتتى قالانىڭ نوبايى دا وسى جەردەن تابىلادى.
– سىزدەر التىن كەزەڭدە ءومىر ءسۇرىپ جاتىرسىزدار. كەيىنگى 10-15 جىل كولەمىندە ادامزات بالاسى مىڭداعان جىلدار بويى ءتۇيىنىن تابا الماي كەلگەن جاڭالىقتار اشىلىپ، يگىلىككە اينالۋدا. بۇگىنگى كورمەدەن سىزدەردىڭ ءاربىر ىسكە شىعارماشىلىقپەن، تىڭ يدەيامەن، ەرەكشە ىنتا-قىزىعۋشىلىقپەن كىرىسىپ جاتقاندارىڭىزدى بايقادىم. ءبىز وبلىستا سىزدەر سياقتى قابىلەتتى بالالاردىڭ بويىنداعى دارىنىن ۇشتاپ، قانداي دا ءبىر جەتىستىككە جەتۋى ءۇشىن كەشەندى ءىس-شارالار اتقارىپ، بارىنشا جاعداي جاساپ وتىرمىز. بۇگىنگى كۇنى ەلىمىزدە ءىت-سىنىپتار اشىلىپ جاتىر، بۇل باعىتتا شىعىس قازاقستان وبلىسى كوش باستاپ تۇر. جىل سايىن وقۋشىلار وزدەرىنىڭ قارىم-قابىلەتتەرىن Skills for geeks چەمپيوناتىندا، ءىت-فەستيۆالدە كورسەتىپ، جەتىستىكتەرگە جەتىپ ءجۇر. وسىنىڭ ءبارى ەل ەرتەڭى – جاستار ءۇشىن ىستەلىپ جاتقان جۇمىستار، – دەپ اتاپ وتكەن وبلىس اكىمى دانيال احمەتوۆ دارىندى وقۋشىلارعا العىس حاتتار مەن گراموتالار، سونداي-اق باعالى ەستەلىك سىيلىقتار سىيلادى.
كەزدەسۋ بارىسىندا الداعى جوسپارلارىمەن بولىسكەن وقۋشىلار ايماق باسشىسىنا تۋعان ولكەمىزدى زەرتتەۋگە باعىتتالعان ارحەولوگيالىق مەكتەپتەر مەن ەكسكۋرسيالىق ساپارلار، IT- تەحنولوگيا سالاسىنداعى ماماندىقتاردىڭ قانشالىقتى سۇرانىسقا يە ەكەندىگى، ستارتاپ-جوبالار بايقاۋى جايلى وزدەرىن قىزىقتىراتىن ساۋالدارىن قويدى.
«ۇزدىك وقۋشى-2019» اتالىمىنا ينفورماتيكا بويىنشا ۇلتتىق قۇرامانىڭ مۇشەسى، جاراتىلىستانۋ-ماتەماتيكا باعىتىنداعى رەسپۋبليكالىق وليمپيادانىڭ ءۇش دۇركىن جەڭىمپازى، ەۋرازيا حالىقارالىق وليمپياداسىنىڭ جەڭىمپازى تەمىرلان بايبولوۆ لايىق دەپ تانىلدى.
«جىل سەرپىنى-2019» اتالىمى قوعامدىق-گۋمانيتارلىق باعىتتاعى پاندەردەن رەسپۋبليكالىق وليمپيادانىڭ جەڭىمپازى، وسكەمەندەگى №12 مەكتەبىنىڭ 11-سىنىپ وقۋشىسى الىشەر حونكۋلوۆقا بەرىلدى.
ايتا كەتەيىك، وتكەن وقۋ جىلىندا زياتكەرلىك ءبىلىم سايىستارىنا قاتىسقان شىعىسقازاقستاندىق وقۋشىلار جيىنى 148 مەدال يەلەنگەن، ونىڭ 43-ءى التىن بولسا، 50-ءى كۇمىس، 55-ءى قولا جۇلدە. مۇنىڭ ىشىندە ەرەكشە اتاپ وتە كەتەيىك، 39 مەدالدى وقۋشىلار وڭتۇستىك كورەيا، نيدەرلاندى، برازيليا، يندونەزيا، اۆستراليا، جاپونيا، اقش، بەلارۋس جانە رەسەي سىندى شەتەلدەردەن ەنشىلەپ قايتقان.
قۋان سەيىت
