2018-2019 oqý jylynda «júzden júırik shyqqan» halyqaralyq zııatkerlik olımpıadalar men sporttyq jarystardyń, dúbirli óner dodalarynyń jeńimpazdary men júldegerlerin alqalaý sharasy ótti Óskemende. Bul saltanatty jıynǵa Shyǵys Qazaqstan oblysynyń ákimi Danıal Ahmetov arnaıy qatysty.
Kezdesý bastalmaı turyp aımaq basshysy Danıal Ahmetov oqýshylardyń ǵylymı jobalary men ónerbatystary nazarǵa usynylǵan kórmeni aralap kórdi. Kórmede ne joq deısiz? 3D modeldeýden bastap robottyq tehnıkanyń alaýan túri, hımııa men ınjenerııanyń jetistikteri, kún batareıasymen ushatyn ushaq, avtomattandyrylǵan áýejaı, tipti Sholpan planetasyndaǵy bultty qalanyń nobaıy da osy jerden tabylady.
– Sizder altyn kezeńde ómir súrip jatyrsyzdar. Keıingi 10-15 jyl kóleminde adamzat balasy myńdaǵan jyldar boıy túıinin taba almaı kelgen jańalyqtar ashylyp, ıgilikke aınalýda. Búgingi kórmeden sizderdiń árbir iske shyǵarmashylyqpen, tyń ıdeıamen, erekshe ynta-qyzyǵýshylyqpen kirisip jatqandaryńyzdy baıqadym. Biz oblysta sizder sııaqty qabiletti balalardyń boıyndaǵy darynyn ushtap, qandaı da bir jetistikke jetýi úshin keshendi is-sharalar atqaryp, barynsha jaǵdaı jasap otyrmyz. Búgingi kúni elimizde IT-synyptar ashylyp jatyr, bul baǵytta Shyǵys Qazaqstan oblysy kósh bastap tur. Jyl saıyn oqýshylar ózderiniń qarym-qabiletterin Skills for geeks chempıonatynda, IT-festıvalde kórsetip, jetistikterge jetip júr. Osynyń bári el erteńi – jastar úshin istelip jatqan jumystar, – dep atap ótken oblys ákimi Danıal Ahmetov daryndy oqýshylarǵa alǵys hattar men gramotalar, sondaı-aq baǵaly estelik syılyqtar syılady.
Kezdesý barysynda aldaǵy josparlarymen bólisken oqýshylar aımaq basshysyna týǵan ólkemizdi zertteýge baǵyttalǵan arheologııalyq mektepter men ekskýrsııalyq saparlar, IT- tehnologııa salasyndaǵy mamandyqtardyń qanshalyqty suranysqa ıe ekendigi, startap-jobalar baıqaýy jaıly ózderin qyzyqtyratyn saýaldaryn qoıdy.
«Úzdik oqýshy-2019» atalymyna ınformatıka boıynsha ulttyq quramanyń múshesi, jaratylystaný-matematıka baǵytyndaǵy respýblıkalyq olımpıadanyń úsh dúrkin jeńimpazy, Eýrazııa halyqaralyq olımpıadasynyń jeńimpazy Temirlan Baıbolov laıyq dep tanyldy.
«Jyl serpini-2019» atalymy qoǵamdyq-gýmanıtarlyq baǵyttaǵy pánderden respýblıkalyq olımpıadanyń jeńimpazy, Óskemendegi №12 mektebiniń 11-synyp oqýshysy Álisher Honkýlovqa berildi.
Aıta keteıik, ótken oqý jylynda zııatkerlik bilim saıystaryna qatysqan shyǵysqazaqstandyq oqýshylar jıyny 148 medal ıelengen, onyń 43-i altyn bolsa, 50-i kúmis, 55-i qola júlde. Munyń ishinde erekshe atap óte keteıik, 39 medaldi oqýshylar Ońtústik Koreıa, Nıderlandy, Brazılııa, Indonezııa, Avstralııa, Japonııa, AQSh, Belarýs jáne Reseı syndy shetelderden enshilep qaıtqan.
Qýan Seıit
