«Mass-medıa» týraly zań jobasy Májilistegi birinshi oqylymda maquldandy, dep habarlaıdy «Adyrna» tilshisi.
Qujatty Mádenıet jáne aqparat mınıstri Aıda Balaeva tanystyrdy.
«Mınıstrlik zań jobasyn memleket múddesin, qoǵam suranysyn jáne medıa salasynyń damý tendenııalaryn eskere otyryp ázirledi.
Ony daıyndaý barysynda Eýropa elderiniń halyqaralyq tájirıbesi, Birikken Ulttar uıymy men Eýropadaǵy qaýipsizdik jáne yntymaqtastyq uıymynyń strategııalyq qujattary jan-jaqty zerdelendi»,—dedi ol.
Aıtýynsha, zań jobasynyń negizgi maqsaty – sóz bostandyǵyn, aqparattyq qaýipsizdikti qamtamasyz etý, ásirese jýrnalısterdiń mártebesin arttyrý jáne memlekettik tıimdi aqparattyq saıasatty qalyptastyrý.
Sondaı-aq mınıstr jańa zań jobasyna sáıkes BAQ-tyń resmı saýalyna jaýap berý merzimi 7 kúnnen 5 kúnge qysqaratynyn atap ótti. Budan bólek otandyq teleradıo habar taratatyn spýtnıktik operatorlardyń shyǵyndarynyń bir bóligi sýbsıdııalanady. Al 2025 jyldan bastap memlekettik emes BAQ respýblıkalyq deńgeıde granttyq qarjylandyrýǵa kóshetin bolady.
Aıta keteıik, ekinshi oqylymǵa deıin jumys toby tıisti memlekettik organdarmen zań jobasyn talqylaıdy.
