كوميسسياعا داستارحان جايعان مۇعالىمدەر 20 تاۋلىككە قامالۋى مۇمكىن

2772
Adyrna.kz Telegram

اقتوبە وبلىسى بايعانين اۋدانىنداعى توبىق جارماعامبەتوۆ اتىنداعى مەكتەپ مۇعالىمدەرى وبلىستىق ءبىلىم باسقارماسىنا قاراستى مەكەمەدەن كەلگەن قوناقتاردى باي داستارحانمەن قارسى العان. بۇل زاڭعا تومپاق ەكەن. قك-ءتىڭ 247 بابىنا سايكەس 80 اەك ايىپپۇل تولەيدى نەمەسە 80 ساعات قوعامدىق جۇمىسقا تارتىلۋى مۇمكىن. ياكي 20 تاۋلىككە دەيىن قاماۋعا الىنۋى دا ىقتيمال.

وسىلايشا وبلىستىق ءبىلىم باسقارماسى باستىعى ءلاززات ورازباەۆانىڭ قاراماعىنداعى اقتوبەلىك مەيمانداردىڭ ءىس-ساپارى اۋدانداعى مۇعالىمدەردى الاڭداتىپ تاستادى.

وبلىستىق پەداگوگيكالىق-دارىگەرلىك-پسيحولوگيالىق كەڭەسىنىڭ 10 قىزمەتكەرى  بالالاردى ارنايى ءبىلىم بەرۋ ۇيىمدارىنا تۇزەتۋ جۇمىستارىنا جولداما بەرۋ ءۇشىن تەكسەرۋ جۇرگىزۋگە كەلگەن ەكەن.

«اۋدان مۇعالىمدەرى داستارحاندى وزدەرى اقشا جۇمساپ جايماعاندارىن ايتتى. ول داستارحان وبلىستان كەلگەن قوناقتاردىڭ ەسەبىنەن جايىلىپتى. بىراق داستارحانعا قاراپ: «ولار ۇيدە دە وسىلاي ادەمى تاماقتانا ما، بايعانيندىك ۇستازدار نەگە ءستول جاساۋ كەرەك،  سانيتارلىق نورماعا سايكەس مەكتەپ كابينەتتەرىندە داستارحان جايۋعا رۇقسات بار ما؟» دەگەن سۇراقتار تۋىندادى»، - دەيدى «ادالدىق الاڭى» جوبالىق كەڭسەسىنىڭ  ساراپتاما كەڭەسىنىڭ توراعاسى جانبولات تۇرتاەۆ.

قازىر بارلىق اۋدان ورتالىقتارىندا عانا ەمەس، ءتىپتى كەيبىر اۋىلداردا جاقسى تاماقتانۋعا بولاتىن  مەيرامحانا، ءدامحانا، اسحانالارى بار. داستارحاندى مەكتەپتە جايۋدىڭ قانشالىقتى قاجەتى بار دەيدى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنە قارايتىن «ادالدىق الاڭى» كەڭسەسىنىڭ وكىلدەرى.

ءاربىر تەكسەرىسكە داستارحان دايارلايتىندار كوبىنە مۇنداي جاعدايدى قازاقتىڭ قوناقجايلىلىعىمەن تۇسىندىرەدى ەكەن.

ءيا، ءبىر جاعىنان ول دا دۇرىس، ءبىز ءوزىمىزدىڭ سالت-ءداستۇرىمىزدى جانە ونىڭ ماڭىزدىلىعىن جوعالتپاۋ كەرەكپىز. بىراق ءوزىمىزدىڭ تۋىستارىمىزبەن مەملەكەت تولىق تۇردە بارلىق ءىس-ساپار شىعىندارىن وتەيتىن تەكسەرۋشىلەردى شاتاستىرۋعا بولمايدى. ونىڭ ۇستىنە تەكسەرىس كوپ، ەگەر ولاردىڭ بارلىعىنا، ياعني ءىس ساپارمەن كەلۋشىلەرگە، كۇنىنە بىرنەشە رەت مولىنان داستارحان جايىلسا ول شەكتەن شىققاندىق دەپ تۇسىندىرەدى «ادالدىق الاڭىنىڭ» ءباسپاسوز قىزمەتى.

«تەكسەرۋشىلەر كەلگەن سايىن  داستارحان جايۋ ونسىز دا از جالاقى الاتىن قاتارداعى جۇمىسشىلاردىڭ قالتاسىن قاعاتىنى انىق.  ءوز كەزەگىندە، ولار جەكەلەگەن كاسىپكەرلەردى ەرىكسىز «كەشكى اس» جايۋعا نەمەسە  باقىلاۋشىلارعا تۇنەۋگە ورىن ۇسىنۋ ارقىلى سىبايلاس جەمقورلىق قاۋپىن تۋدىرۋى مۇمكىن»، - دەيدى «ادالدىق الاڭى» جوبالىق كەڭسەسى ساراپشىلار كەڭەسىنىڭ توراعاسى جانبولات تۇرتاەۆ.

قازىر اتالعان وقيعا بويىنشا اقپارات وبلىستىق ءبىلىم باسقارماسىنا قاراۋعا جانە ءتيىستى شارا قولدانۋعا جولدانعان. جوبالىق  كەڭسە وسى باعىتتاعى جۇمىستى ءارى قاراي بەلسەندى تۇردە جالعاستىرامىز دەپ وتىر. ول ءۇشىن جوعارىدا اتالعان وقيعاعا بەي-جاي قارامايتىن جانە وسىعان ۇقساس جاعداي ورىن العاندا حابارلاي الاتىن تۇرعىنداردىڭ كومەگى قاجەت ەكەنىن ايتادى.

جانار قوجانوۆا

"جاس الاش"

پىكىرلەر