رەپرودۋكتيۆتى دەنساۋلىعىنا قاتىستى سانالى شەشىم قابىلداپ، ونى جوسپارلاي ءبىلۋ مۇمكىندىگى قازىرگى ايەلدەردىڭ ءوز بولاشاعىنا سەنىممەن قاراۋىنا ىقپال ەتەتىن باستى فاكتورلاردىڭ بىرىنە اينالىپ وتىر.
الايدا جۇيەلى جوسپارلاۋدىڭ بولماۋى جانە كونتراتسەپتسياعا قاتىستى قالىپتاسقان ستەرەوتيپتەر ءالى دە ايەلدەردىڭ كاسىبي ماقساتتارىن كەيىنگە شەگەرۋىنە سەبەپ بولىپ كەلەدى. استانادا «گەدەون ريحتەر قازاقستان» كومپانياسىنىڭ قولداۋىمەن وتكەن ساراپشىلىق دوڭگەلەك ۇستەل وتىرىسىنا ۇسىنىلعان الەۋمەتتىك ساۋالناما ناتيجەلەرى وسى ماسەلەنىڭ وزەكتىلىگىن كورسەتتى. ساۋالناماعا قاتىسقان ايەلدەردىڭ 86%-ى دەنساۋلىقتى الدىن الا جوسپارلاۋ مانساپتى سەنىمدى قۇرۋعا جانە ومىردەگى ماڭىزدى رولدەردى قاتار الىپ جۇرۋگە كومەكتەسەتىنىنە سەنىمدى.
ساۋالناما ناتيجەسىنە سايكەس، قاتىسۋشىلاردىڭ 42,3%-ى مانساپ جولىنداعى ماقساتتارىنا بايلانىستى جۇكتىلىكتى كەيىنگە قالدىرۋعا ءماجبۇر بولعانىن، ال 47,7%-ى دەكرەتتىك دەمالىسقا شىعۋىنا بايلانىستى جۇمىس جوسپارلارىن وزگەرتۋگە تۋرا كەلگەنىن اتاپ ءوتتى. ءاربىر ءۇشىنشى ايەلگە (35,1%) ۇزاق ۇزىلىستەن كەيىن جۇمىسقا قايتا ورالۋ قيىنعا سوققان.
سونىمەن قاتار رەسپوندەنتتەردىڭ 76,5%-ى وزدەرىن رەپرودۋكتيۆتى دەنساۋلىق ماسەلەلەرى جونىندە جەتكىلىكتى اقپاراتتانعان دەپ ەسەپتەيدى. الايدا ولاردىڭ تەك 14,4%-ى بىرىكتىرىلگەن ءورالدى كونتراتسەپتيۆتەردى (بوك) قولدانادى، ال 35,1%-ى كەمىندە ءبىر رەت شۇعىل كونتراتسەپتسيا ادىستەرىنە جۇگىنگەن.
ايەلدەر اراسىندا ەسكىرگەن تۇسىنىكتەر ءالى دە ساقتالىپ وتىر. ماسەلەن، ساۋالناماعا قاتىسقانداردىڭ 21,6%-ى گورمونداردىڭ اعزاعا شامادان تىس تۇسۋىنەن قاۋىپتەنسە، 9,9%-ى سالماق قوسىپ الۋدان قورقادى.
دەگەنمەن مەديتسينا ماماندارى قازىرگى فارماتسەۆتيكا سالاسىنىڭ ايتارلىقتاي دامىعانىن اتاپ وتەدى. گورمون مولشەرى تومەن پرەپاراتتاردى دارىگەر ءار ايەلدىڭ اعزاسىنىڭ ەرەكشەلىكتەرىن، ءومىر سالتىن جانە رەپرودۋكتيۆتى جوسپارلارىن ەسكەرە وتىرىپ، جەكە تاڭدايدى.
«كونتراتسەپتسياعا قاتىستى قاتە تۇسىنىكتەردى جويۋ جانە گينەكولوگقا تۇراقتى تۇردە قارالۋ مادەنيەتىن قالىپتاستىرۋ – ايەلدەردىڭ جۇمىس پەن وتباسىنىڭ ءبىرىن تاڭداۋعا ءماجبۇر بولماۋىنىڭ ماڭىزدى العىشارتى. ءبىزدىڭ ماقساتىمىز – ايەلدەردىڭ ءوز دەنساۋلىعىنا قاتىستى ءاربىر شەشىمدى قاۋىپسىز ءارى سانالى تۇردە قابىلداۋى ءۇشىن ولاردى سەنىمدى اقپاراتپەن قامتاماسىز ەتۋ»، – دەدى «گەدەون ريحتەر» كومپانياسى ورتالىق جانە شىعىس ازيا كلاستەرىنىڭ PR جانە كورپوراتيۆتىك الەۋمەتتىك جاۋاپكەرشىلىك جونىندەگى ساراپشىسى دينارا بىرماعامبەتوۆا.
كەزدەسۋگە قۇرىلتاي دەپۋتاتى دينارا ناۋموۆا، سونداي-اق قوعامدىق دەنساۋلىق ساقتاۋ جانە ۇەۇ-مەن ارىپتەستىك باسقارماسىنىڭ باس ساراپشىسى توميريس تۇراباي قاتىستى.
جيىندا مەكتەپ جاسىنان باستاپ اعارتۋ جۇمىستارىن جۇرگىزۋدىڭ جانە انا بولۋدى قولداۋعا باعىتتالعان زاڭنامالىق جاعدايلاردى جەتىلدىرۋدىڭ ماڭىزدىلىعى اتاپ ءوتىلدى.
