اسەم ورىنباي قاتار مەملەكەتىنىڭ استاناسى دوحادا ءوتىپ جاتقان نىسانا كوزدەۋدەن الەم كۋبوگىنىڭ فينالىندا التىن مەدال جەڭىپ الدى. بۇل تۋرالى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
ۇلتتىق قۇراما سپورتشىسى ستەند اتۋدىڭ سكيت باعدارلاماسىندا اقتىق سىنعا شىعىپ، 51 بالل جينادى. كيارا دي مارتسيانتونيو (يتاليا) 50 نىسانا ءدال كوزدەپ كۇمىس جۇلدەگە يە بولسا، قولا مەدال دانيا دجو ءۆيتستسيدىڭ (اقش) ەنشىسىندە. بۇل سىندا 3 دۇركىن وليمپيادا چەمپيونى كيمبەرلي روۋد (اقش) جۇلدەگە ءبىر تابان جەتپەي توقتادى (34 ۇپاي).
قازاق مەرگەنى قازىر ISSF رەيتينگىندە 7-ورىندا كەلە جاتىر.
«وتە باقىتتىمىن. جارىستا كۇن رايى قولايلى بولدى دەپ ايتا المايمىن. ءسات سايىن جەل تۇرىپ، «توسىن سىي» جاساپ جاتتى. سوعان قاراماستان ۇزدىك شىقتىم. بۇل وسى ماۋسىمداعى سوڭعى جارىس. بار ويىم لايىقتى ونەر كورسەتۋ بولدى»،-دەدى سپورتشى.
ايتا كەتەيىك، بيىلعى ماۋسىمدا اسەم ورىنباي ءار جارىستا تۇراقتى ونەر كورسەتىپ، بىرنەشە رەت تۇعىر بيىگىنە كوتەرىلدى. مامىردا الماتىدا وتكەن رەيتينگتىك الەم كۋبوگىندا جەكەلەي سىندا توپ جارىپ، ءىزىن الا ارىپتەسى ەدۋارد ەششەنكومەن بىرلەسىپ، كۇمىس جۇلدەگەر اتاندى. جازدا لوناتوداعى (يتاليا) الەم كۋبوگىندا ارالاس جۇپتار اراسىندا (ەدۋارد ەششەنكومەن) 3-ورىن العان.
حالىقارالىق نىسانا كوزدەۋ فەدەراتسياسى (ISSF) مۇنداي فينالدى اراعا 4 جىل سالىپ ۇيىمداستىرىپ وتىر. باسەكەدە 42 ەلدەن كەلگەن 179 ۇزدىك مەرگەن باق سىناۋدا.
