ماماندىق تاڭداۋ كەزەڭىندە تۇرعان وقۋشىلارعا باعىت-باعدار بەرىپ، ولاردىڭ دۇرىس جول تاڭداۋىنا ىقپال ەتۋ — مەكتەپتىڭ باستى مىندەتى. ءدال وسى ماقساتتا الماتى قالاسى اۋەزوۆ اۋدانىنداعى احمەت بايتۇرسىنوۆ اتىنداعى №139 مەكتەپ-گيمنازياسى «ەڭبەگىمەن ەل تانىعان» اتتى ونەر مايتالماندارىمەن كەزدەسۋ كەشىن وتكىزدى. ارنايى قوناق رەتىندە قازاق ونەرىنىڭ جارىق جۇلدىزدارى — اكتەر، قازاقستاننىڭ ەڭبەك سىڭىرگەن قايراتكەرى مۇرات ءنۇراسىلوۆ پەن «سەرپەر» جاستار سىيلىعىنىڭ لاۋرەاتى اسەت يمانعاليۇلى شاقىرىلدى.
ونەر يەلەرىن مەكتەپ ۇجىمى ارنايى وركەستردىڭ سۇيەمەلدەۋىمەن قارسى الدى. ءىس-شارا بارىسىندا مەكتەپ-گيمنازيا وقۋشىلارى احمەت بايتۇرسىنوۆ مۇراجايىن تانىستىرىپ، قوناقتارعا ەكسكۋرسيا جۇرگىزدى.
كەزدەسۋ كەشى ءارى قاراي سۇراق-جاۋاپپەن جانە وقۋشىلاردىڭ ونەرىمەن جالعاستى.
«5» د سىنىپ وقۋشىسى ەسەن نۇرلىبەك ءوزىنىڭ ارناۋ ولەڭىن وقىپ، قوناقتاردى تاڭعالدىرسا، ايزەرە كونكاباەۆا، بايراموۆ ءالي جانە ميدحاتوۆا امينا كۇمىس كومەي داۋىستىرىمەن كوپشىلىكتىڭ ىقىلاسىنا بولەندى.
ءىس-شارا بارىسىندا مەكتەپ-گيمنازيا جانىنان اي سايىن شىعاتىن «ەلسانا» گازەتىنىڭ جاس تىلشىلەرى اۆتورلىق تۋىندىلارىن وقىدى.
سونداي-اق وقۋشىلار ءارتىس اعالارىنا وزدەرىن تولعاندىرىپ جۇرگەن سۇراقتارىن قويىپ، ءساتتى مۇمكىندىكتى ۇتىمدى پايدالانىپ قالۋعا تىرىستى.
بەلگىلى كينو جانە تەاتر اكتەرلەرى مۇرات ءنۇراسىلوۆ پەن اسەت يمانعاليۇلى سۇقباتتاسا وتىرىپ، ءبىلىم الۋشىلاردى ەشقاشان بەرىلمەۋگە، ارمان جولىندا كۇرەسۋگە شاقىردى.
«10 جىل بويى اكتەرلىك ونەر ماماندىعىنا تۇسە المادىم. قازاق ونەرىندە مەن سەكىلدى ەمتيحانداردان قۇلاعان ادام جوق. بەرىلمەي، اقىرىندا ارمانىما جەتتىم. بالا كۇنىمدە ەشكىم بويداعى تالانتتى بايقامادى. وزدىگىمنەن جاقسى اكتەر بولۋعا تىرىستىم»،—دەدى مۇرات ءنۇراسىلوۆ.
وقۋشىلار اسەت يمانعاليۇلىنىڭ جاقسى ءان ايتاتىنىن بايقاپ، ونەر يەسىنە قولقا سالدى. اكتەر دومبىرامەن تامىلجىتا ءان سالىپ، كوپشىلىكتى ەرەكشە سەزىمگە بولەدى. ءىس-شارا بارىسىندا ول ءوزىنىڭ بولاشاقتا ەستراداعا بەت بۇرمايتىنىن، ءان ايتۋدى ءحوببيى سانايتىنىن اتاپ ءوتتى.
كەزدەسۋ سوڭىندا مەكتەپ-گيمنازيا ديرەكتورى ەرىك نۇرعۇمارۇلى ۇجىم جانە وقۋشىلار اتىنان العىس ايتىپ، ونەر مايتالماندارىنا شىعارماشىلىق تابىس تىلەدى.
ديانا اسانوۆا،
№139 مەكتەپ-گيمنازياسى
