Mamandyq tańdaý kezeńinde turǵan oqýshylarǵa baǵyt-baǵdar berip, olardyń durys jol tańdaýyna yqpal etý — mekteptiń basty mindeti. Dál osy maqsatta Almaty qalasy Áýezov aýdanyndaǵy Ahmet Baıtursynov atyndaǵy №139 mektep-gımnazııasy «Eńbegimen el tanyǵan» atty óner maıtalmandarymen kezdesý keshin ótkizdi. Arnaıy qonaq retinde qazaq óneriniń jaryq juldyzdary — akter, Qazaqstannyń eńbek sińirgen qaıratkeri Murat Nurásilov pen «Serper» jastar syılyǵynyń laýreaty Áset Imanǵalıuly shaqyryldy.
Óner ıelerin mektep ujymy arnaıy orkestrdiń súıemeldeýimen qarsy aldy. Is-shara barysynda mektep-gımnazııa oqýshylary Ahmet Baıtursynov murajaıyn tanystyryp, qonaqtarǵa ekskýrsııa júrgizdi.
Kezdesý keshi ári qaraı suraq-jaýappen jáne oqýshylardyń ónerimen jalǵasty.
«5» d synyp oqýshysy Esen Nurlybek óziniń arnaý óleńin oqyp, qonaqtardy tańǵaldyrsa, Aızere Konkabaeva, Baıramov Álı jáne Mıdhatova Amına kúmis kómeı daýystyrymen kópshiliktiń yqylasyna bólendi.
Is-shara barysynda mektep-gımnazııa janynan aı saıyn shyǵatyn «Elsana» gazetiniń jas tilshileri avtorlyq týyndylaryn oqydy.
Sondaı-aq oqýshylar ártis aǵalaryna ózderin tolǵandyryp júrgen suraqtaryn qoıyp, sátti múmkindikti utymdy paıdalanyp qalýǵa tyrysty.
Belgili kıno jáne teatr akterleri Murat Nurásilov pen Áset Imanǵalıuly suqbattasa otyryp, bilim alýshylardy eshqashan berilmeýge, arman jolynda kúresýge shaqyrdy.
«10 jyl boıy akterlik óner mamandyǵyna túse almadym. Qazaq ónerinde men sekildi emtıhandardan qulaǵan adam joq. Berilmeı, aqyrynda armanyma jettim. Bala kúnimde eshkim boıdaǵy talantty baıqamady. Ózdigimnen jaqsy akter bolýǵa tyrystym»,—dedi Murat Nurásilov.
Oqýshylar Áset Imanǵalıulynyń jaqsy án aıtatynyn baıqap, óner ıesine qolqa saldy. Akter dombyramen tamyljyta án salyp, kópshilikti erekshe sezimge bóledi. Is-shara barysynda ol óziniń bolashaqta estradaǵa bet burmaıtynyn, án aıtýdy hobbıi sanaıtynyn atap ótti.
Kezdesý sońynda mektep-gımnazııa dırektory Erik Nurǵumaruly ujym jáne oqýshylar atynan alǵys aıtyp, óner maıtalmandaryna shyǵarmashylyq tabys tiledi.
Dıana ASANOVA,
№139 mektep-gımnazııasy
