Palestınanyń Gaza sektorynda qalǵan qazaqstandyqtardyń sany ataldy. Bul týraly syrtqy ister mınıstriniń birinshi orynbasary Qaırat Omarov málimdedi, dep habarlaıdy Kazinform.
«Qazaqstannyń 17 azamaty qalǵan. Qalǵandary – solardyń otbasy músheleri. Bizdiń azamattar týraly aıtqanda olardyń otbasy músheleri týraly da aıtamyz. Bul naqty Gaza sektoryndaǵy jaǵdaı. Ákelingen 99 adamnyń bir bóligi – elimizdiń azamattary. Qalǵandary solardyń otbasy músheleri. Shekaradan shyqqan kezde Izraıl men Mysyr taraby biz usynǵan tizimdi tyńǵylyqty tekseredi. Shekaradan ótetin adamdardyń arasynda terrorıster joqtyǵyna, elden shyǵarǵysy kelmeıtin adamdar emestigine kóz jetkizý kerek», - dedi Qaırat Omarov.
Sondaı-aq Izraıl aýmaǵyndaǵy qazaqstandyqtardyń esebi erikti túrde júrgiziletindikten, naqty qansha adam baryn dál aıtý múmkin emestigin túsindirdi. Buǵan deıin Izraılden elge oralǵysy keletin Qazaqstan azamattary evakýııalanǵanyn da eske saldy.
Buǵan deıin Gaza sektorynda 161 qazaqstandyq bar ekeni aıtylǵan bolatyn.
«Biz evakýaııa uıymdastyrǵan kezeńde 161 adam boldy. Onyń 99-y elge kelýge nıet bildirdi. Biz sondaı múmkindik usyndyq. Birqatar azamat, 17 adam men onyń otbasy músheleri sonda qalamyz degen sheshim qabyldady. Evakýaııadan túrli sebeppen bas tartty. Elge oralýǵa keliskenderdi ǵana ákeldik. Bul baǵyttaǵy jumystarymyz jalǵasady. Keleshekte qaıtqysy keletinder bolsa, olarmen de jumys isteımiz. Qoldaryna bıleti daıyn, ushyp shyqqysy kelip otyrǵan azamattar bar. Olarmen Mysyrdaǵy, Iordanııadaǵy, Izraıldegi ókildikterimiz jumys istep jatyr», - dedi Syrtqy ister mınıstriniń birinshi orynbasary.
