ىشكى ىستەر مينيسترلىگىنىڭ باسشىسى ەرجان سادەنوۆ پرەزيدەنت قاسىم-جومارت توقاەۆقا ەلدەگى جەدەل جاعداي تۋرالى باياندادى، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەمە جاساپ.
مينيستر قازاقستاندا قىلمىستىڭ ازايۋ ءۇردىسى جالعاسىپ جاتقانىن ايتتى: كىسى ءولتىرۋ 20 پايىزعا، ۇرلىق 28 پايىزعا، توناۋ 32 پايىزعا ازايعان. سونداي-اق، ونىڭ ايتۋىنشا، توناۋ، بۇزاقىلىق، مال ۇرلىعى، دەنساۋلىققا اۋىر زيان كەلتىرۋ جانە باسقا دا، سونىڭ ىشىندە تۇرمىستىق سالاداعى قىلمىستار ازايعان.
قاسىم-جومارت توقاەۆقا قۇقىقبۇزۋشىلىققا مۇلدە توزبەۋشىلىك قاعيداتىن قالىپتاستىرۋ، زاڭعا قايشى ارەكەتتەر مەن قىلمىس جاساعانى ءۇشىن جازانىڭ بۇلتارتپاستىعىن ىسكە اسىرۋ، جول قاۋىپسىزدىگىن قامتاماسىز ەتۋ جۇمىستارى تۋرالى مالىمەت بەرىلدى.
بۇگىندە 8 ميلليون 500 مىڭ زاڭعا قايشى ارەكەت انىقتالعان. بۇل وتكەن جىلمەن سالىستىرعاندا 1 ميلليونعا كوپ. جاسالعان قۇقىقبۇزۋشىلىقتار ءۇشىن 90 ميلليارد تەڭگە كولەمىندە اكىمشىلىك ايىپپۇل سالىندى، 71 ميلليارد تەڭگە ءوندىرىپ الىندى.
سونىمەن قاتار پرەزيدەنتكە ىشكى ىستەر ورگاندارىنىڭ جۇمىسىن جەتىلدىرۋ، سونىڭ ىشىندە ءىىو قىزمەتكەرلەرىن اتتەستاتسيادان وتكىزىپ، ۆەدومستۆونى لايىقسىز مامانداردان تازارتۋ شارالارى تۋرالى باياندالدى.
كەزدەسۋ سوڭىندا قاسىم-جومارت توقاەۆ «زاڭ جانە ءتارتىپ» قاعيداتىن قامتاماسىز ەتۋ جونىندە بىرقاتار ناقتى تاپسىرما بەردى.
مەملەكەت باسشىسى قوعامدا ادىلدىك پەن ءتارتىپ ورناتۋ ءۇشىن قۇقىق قورعاۋ ورگاندارىنىڭ قىزمەتكەرلەرىنە ۇلكەن جاۋاپكەرشىلىك جۇكتەلگەنىن ايتتى.
