Tájikstan prezıdenti Emomalı Rahmon Reseı prezıdenti Vladımır Pýtınge ony III dárejeli «Otanǵa sińirgen eńbegi úshin» ordenimen marapattaý týraly sheshimi úshin alǵys aıtyp, bul marapatty búkil tájik halqynyń eńbegi dep atady, dep jazady "Adyrna".
«Vladımır Vladımırovıch, meni «Otanǵa sińirgen eńbegi úshin» ordenimen marapattaý týraly sheshim qabyldaǵanyńyz úshin rahmet. Men bul marapatty tájik-reseı qarym-qatynasyn nyǵaıtýǵa qosqan qarapaıym úlesim úshin joǵary baǵa retinde qabyldaımyn», - dedi Rahmon marapatty tapsyrǵannan keıin.
Ol muny «birinshi kezekte búkil Tájikstan halqynyń baýyrlas Reseımen strategııalyq seriktestik pen odaqtastyq qatynastarynyń turaqty damýyna sińirgen eńbegimen» baılanystyratynyn atap ótti.
Pýtın Tájikstan basshysyn marapattaý týraly jarlyqqa 2022 jyldyń qazan aıynda qol qoıǵan. Rahmon memlekettik nagradamen Reseı Federaııasy men Tájikstan Respýblıkasy arasyndaǵy strategııalyq seriktestik pen odaqtastyq qatynastaryn nyǵaıtýǵa, sondaı-aq óńirlik turaqtylyq pen qaýipsizdikti qamtamasyz etýge qosqan zor úlesi úshin marapattaldy.
Rásim barysynda Pýtın Rahmon ekeýi uzaq jyldar boıy birge jumys istegende ózara tıimdi sheshimder tabýǵa múmkindik beretin ónimdi jáne senimdi qarym-qatynas ornatqanyn atap ótti. Pýtın bul syılyqty Rahmonnyń Máskeý men Dýshanbe arasyndaǵy dostyqty, strategııalyq seriktestik pen odaqtastyqty nyǵaıtýǵa qosqan orasan zor jeke úlesin moıyndaý ekenin atap ótti.
