ۇستاز – ۇلى ۇعىم. پەداگوگ ماماندىعىنىڭ قاي زاماندا بولسىن بەدەلى اسقاق. سەبەبى ەلدىڭ ەرتەڭى بۇگىنگى جاس ۇرپاقتىڭ قولىندا. ال كەلەشەكتى تاربيلەيتىن، ءبىلىم نارىمەن سۋسىنداتاتىن – ۇستاز، پەداگوگ.
بۇگىندە جاستار اراسىندا پەداگوگيكانى قالاپ، ماماندىقتى سەرىك ەتكەندەردىڭ قاراسى قالىڭ. ارينە، جىل سايىن تالاپكەرلەردىڭ سانى ارتسا، دەمەك بۇل سالاداعى باسەكەلەستىكتىڭ دە قىزىپ تۇرعانى.
پەداگوگ ماماندىعىنىڭ بەدەلى ارقاشان بيىك بولۋعا ءتيىس. ويتكەنى كەز كەلگەن ءبىلىم ورداسىنىڭ جانى – مۇعالىم. ول قاراپايىم بالاباقشا، مەكتەپ، كوللەدج نە جوعارعى وقۋ ورنى بولسا دا ەڭ اۋەلى وندا جۇمىس ىستەيتىن ماماندار – پەداگوگ. ونىڭ ۇستىنە مۇعالىمنىڭ مىندەتى مەن دارەجەسىنە بايلانىستى كوپتەگەن ۇلى تۇلعالاردىڭ ويى، قاناتتى ءسوزى جەتەرلىك. سونىڭ كەز كەلگەنىن جادىندا ساقتاپ، ءوز ءومىرىن بىلىممەن ساباقتاستىرعان ءار پەداگوگتىڭ بەرەرى مول، ايتارى تاۋسىلماس.
جالپى ءبىلىم مەن عىلىم جان-جاقتى يكەمدىلىكتى، ەرەكشە مەيىرىمدى، بىلىمدىلىكتى تالاپ ەتەدى. وسى باعىتتاعى ماماندىقتى تاڭداعاندار ادامدى تاني ءبىلۋى، شەبەرلىكتى مەڭگەرۋى ءتيىس. سەبەبى ءار ادامنىڭ بويىنا ءبىلىم دارىتىپ، ونى «قوعامنىڭ سانالى ازاماتى» ەتىپ تاربيەلەۋ ەكىنىڭ ءبىرىنىڭ قولىنان كەلمەيتىن ۇلى ءىس! پەداگوگيكا – ءبىلىم بەرۋىمەن، تالماي ىزدەنىس، بىلىمگە دەگەن قۇشتارلىق، بالانى تاربيەلەۋ، وزگەنىڭ ۋاقىتىن ايالاپ، عىلىمعا قۇشتارلىعىن وياتۋىمەن قۇندى، وسىلارمەن ارداقتى.
بۇگىندە پەداگوگتەر دۇنيەجۇزىلىك ءبىلىم، اقپارات، ەكونوميكا كەڭىستىگىندە، قاتاڭ باسەكەدە باق سىناپ، ەلدىڭ ەرتەڭى ءۇشىن ايانباي تەر توگۋدە. وسى ورايدا ماعجان جۇماباەۆتىڭ ۇلى ءسوزى بار. «التى الاشتىڭ بالاسى باس قوسا قالسا، توردەگى ورىن مۇعالىمدىكى». ارينە، ساۋاتىن اشىپ، ءارىپتى ۇيرەتكەن پەداگوگتەرگە باس ءيىپ، ەسىمىن ارداقتاۋ قاجەت.
وسى تۇستا مەملەكەتىمىزدە دە «پەداگوگ مارتەبەسى تۋرالى» زاڭ جوبالارى جاسالىپ، بەكىتىلگەن بولاتىن. ەندى پەداگوگتىڭ «مارتەبەسى» زاڭمەن بەكىتىلىپ، قورعالادى. بۇل زاڭعا 2019 جىلى 30 جەلتوقساندا قازاقستان پرەزيدەنتى قاسىم-جومارت توقاەۆ قول قويدى.
جاڭا زاڭ اياسىندا مۇعالىمنىڭ ءوز سالاسىندا جەكە دامۋىنا، شىعارماشىلىقپەن اينالىسۋىنا، مول ىزدەنىسىنە جانە وقۋ پروتسەسىن جەتىلدىرۋگە مۇمكىندىگى بولۋى كەرەكتىگى ايتىلعان. پەداگوگتىڭ وقىتۋ مەن تاربيەلەۋدىڭ جەكە اۆتورلىق ادىستەرىن ازىرلەۋى جانە ونى ساباق بارىسىندا قولدانۋى، ءبىلىم بەرۋدەگى وقۋ قۇرالدارى مەن كەز كەلگەن اقپاراتتىق رەسۋرستى تەگىن ءارى قولجەتىمدى تۇردە پايدالانۋى بويىنشا كاسىبي قۇقىقتارى كەڭەيتىلگەن.
سونداي-اق ەلىمىزدىڭ مۇعالىمدەرى قاعاز باستىلىقتان ارىلىپ، بار كۇشى مەن ىنتاسىن بالا بىلىمىنە ارنايدى. سەبەبى بۇدان بىلاي كەز كەلگەن پەداگوگتى سالاسىنا ءتان ەمەس فۋنكتسيالارعا تارتۋعا، شامادان تىس ەسەپ بەرىپ، ۋاقىتىن الۋعا، نەگىزسىز تەكسەرۋلەر جۇرگىزۋگە تىيىم سالۋ ارقىلى جۇكتەمەنى ازايتۋ ماقساتىندا جەكە نورمالار كوزدەلگەنىن دە ايتا كەتەيىك
كەز كەلگەن ىزدەنىس ءۇشىن ماتەريالدىق قاراجات پەن ىنتا بولۋى كەرەك. الايدا عىلىم مەن بىلىمگە بەت بۇرعان ۇستاز ءۇشىن ۇلكەن قاراجات قالتاعا اۋىر بولاتىنى جاسىرىن ەمەس. وسى تۇستا مۇعالىمدەردىڭ ايلىعىن جىل سايىن ونىڭ بىلىكتىلىگىنە قاراي كوتەرىپ، ەڭبەك اقىسىن تولەۋ جۇمىستارى دا بيلىكتىڭ نازارىنان تىس قالماعان. ونىڭ ۇستىنە بۇگىندە پەداگوگيكانى تاڭداپ، ءبىلىم الۋعا اسىققان ستۋدەنتتەردىڭ دە اي سايىنعى شاكىرتاقىسى وسۋدە. بۇل دا بولاشاق ۇستازداردىڭ ويى بولىنبەي، تەك بار ىقىلاسى بىلىمدە بولۋىنا ءبىر سەپ بولىپ وتىر.
«قازاقستاننىڭ ەڭبەك سىڭىرگەن ۇستازى» اتتى قۇرمەتكە يە بولعان پەداگوگ 1000 ەسەلەنگەن ايلىق ەسەپتىك كورسەتكىش مولشەرىندە بىرجولعى تولەم الىپ وتىرادى. بۇل 2019 جىلى پرەزيدەنتتىڭ بەكىتكەن زاڭناماسى بويىنشا قابىلدانعان. سونىمەن قاتار، قالادان تىس، اۋىلدىق جەرلەردە جۇمىس ىستەيتىن پەداگوگتەردىڭ ەنشىسىنە جەكە تۇرعىن ءۇي قۇرىلىسى ءۇشىن جەر ۋچاسكەلەرىن باسىم تارتىپپەن بەرۋگە كەپىلدىك بەلگىلەنىپ قويعان.
مۇعالىمدەردى وزدەرىنە ءتان ەمەس جۇمىستارعا تارتۋعا دا زاڭمەن تىيىم سالىنعان. ولاردى الەۋمەتتىك، مادەني، ەكونوميكالىق شارالارعا كومەك كورسەتۋگە مىندەتتەيتىن نورمالار مەن ءجيى قايتالاناتىن ەرەجەلەرى بار نورمالار الىنىپ تاستالعان.
ءبىلىم بەرۋدە قازىر اۋقىمدى كەڭ الەۋمەتتىك پروتسەسستەر ورىن الۋدا. بولاشاق مۇعالىمدەردى دايارلاۋدا ستۋدەنتتەردى كاسىپكە باۋلۋ، ولاردى الەۋمەتتەندىرۋ پروتسەسستەرىن ۇشتاستىرۋ قاجەت. پەداگوگيكالىق ءبىلىم بەرەتىن جوعارى وقۋ ورنىنىڭ تابالدىرىعىن اتتاعان ءاربىر ستۋدەنتتىڭ باستى ارمانى جوعارى ساپالى دەڭگەيدە تاڭداعان كاسىبىن مەڭگەرۋ. ساپالى ءبىلىم بولماسا ناعىز پەداگوگ بەينەسى مەن مۇعالىم بولمىسى، ادامدىق تۇلگا قالىپتاسپايدى.
ءتۇرلى ماماندىقتىڭ ىشىندە مۇعالىمدىك ۇلكەن مىندەت پەن جاۋاپكەرشىلىگى مول ماماندىق. ول وسكەلەڭ ۇرپاقتى قوعامنىڭ بولاشاق ازاماتى رەتىندە تاربيەلەي وتىرىپ، كەز كەلگەن ادامنىڭ ورتاعا الەۋمەتتەنۋىنە بايلانىستى جۇمىستار اتقارىپ، بالانىڭ ءتىلىن تاباتىن ادام.
مۇعالىمدەر عاسىرلار بويى قالىپتاسىپ، ءتۇرلى وزگەرىسكە ۇشىراعان، ناتيجەلى الەۋمەتتىك تاجىريبەنى سارالاپ ەڭ دۇرىس جانە ەڭ قاجەتتى جاقتارىن ءجاسوسپىرىمنىڭ بويىندا قالىپتاستىرۋعا تىرىساتىنىن ناعىز مامان. سوندىقتان مۇعالىم مارتەبەسى قاشان دا بيىك، مارتەبەلى ءارى قۇندى بولىپ قالا بەرمەك.
