نۇرسۇلتان ۇستاز دەگەن اتپەن ەلگە تانىلعان بۇل كىسىنى الەۋمەتتىك جەلىدەن كوپ كورەمىن. پايعامبارلار قيسساسى، يسلام تاريحى تۋرالى ۋاعىزدارىن تيك-توك، You Tube-تان تىڭدادىم. قمدب يمامدارىنىڭ ستاندارتتى ۋاعىزدارى ەدى.
الگىندە سول جەلىدەن بۇل "ۇستازدىڭ" تاعى ءبىر قىسقا ۆيدەوسى (Reels) جىلتىڭ ەتە قالدى. ءبىر پودكاستقا بارىپتى. سوندا سويلەگەن ءسوزى بولسا كەرەك. بۇيدەيدى:
"ۇلت - ۇلتىمەن، بىراق اللانىڭ الدىندا ۇلت ءبىرىنشى ورىندا تۇرمايدى. اللانىڭ الدىندا ءدىن ءبىرىنشى ورىندا تۇرادى. مىسالى، قازاق ۇلتى، تۇركى ۇلتى قانەكەي دەپ، شاقىرا ما اللا سەنى؟! جوق! مۇسىلماندار دەپ شاقىرادى عوي. مۇحاممەدتىڭ ۇممەتى دەپ شاقىرادى عوي... اتەيست قازاقتى قالاي شاقىرادى؟.. سوندىقتان ادام ءبىرىنشى مۇسىلمان، سونى ۇمىتپاۋى كەرەك. ۇلت ەكىنشى ورىندا. قازاق سەن ەكىنشىسىڭ... سەن ءبىرىنشى قۇدايدىڭ الدىنداعى قۇلدىق مارتەبەڭدى ءبىلىپ الۋ كەرەكسىڭ،- دەيدى.
ال نە دەيسىزدەر، بۇعان؟
نۇرسۇلتان رىسماعامبەتۇلى دەگەن بۇل كىسىنىڭ فاناتتارى وتە كوپ. جانە ولار كۇن ساناپ ءوسىپ كەلەدى. قاراڭىز:
Instagram-داعى پاراقشاسىنا جازىلعاندار سانى: 423 مىڭ ادام.
تيك-توكتاعى "نۇرسۇلتان رىسماعامبەتۇلى" دەگەن اككاۋنتتاعى جازىلۋى سانى: 13,8 مىڭ ادام.
You Tube-تەگى ءارتۇرلى ارنالارداعى "نۇرسۇلتان ۇستازدىڭ" سۇحباتتارى، ۋاعىز-دارىستەرى، پودكاستتارىنىڭ قارالىمى: 20 مىڭنان باستالىپ، 1,5 ميلليوننان اسادى. ء"ىلىم نۇرى" دەيتىن ارناداعى ۋاعىز-دارىستەرىنىڭ ورتاشا قارالىمى 300 مىڭنىڭ اينالاسىندا. ەڭ كوپ قارالعانى – 1,5 ملن.
الگىندە جىپىرلاعان ادامنىڭ ورتاسىندا وتىرىپ ۋاعىز ايتىپ جاتقان دا وسى كىسى. اتىراۋداعى مەشىتتە جۇرت "اللاحۋ اكبارلاپ" قارسى الىپ جاتقان دا وسى كىسى.
وسىنشا اۋديتوريانى اۋزىنا قاراتىپ وتىرعان نۇرسۇلتان رىسماعامبەتۇلى قانشا جەردەن "اۋليەشالىس" ادام بولسا دا، بۇل ايتقانىمەن كەلىسپەيمىن!
كەزىندە قازاقستان ۇكىمەتىنىڭ "قازاقستاندىق ۇلت" دەگەن جوباسىنا ەستى جۇرت ورە-تۇرەگەلىپ قارسى بولعان ەدى. زيالىلار قارسى ءسوز ايتىپ، سول كەزدەگى بيلىكتىلەردىڭ بەتىن قايتارعان ەدى.
"حيت-يمامنىڭ" مىنا ايتقاندارى دا ءسوز اراسىنداعى ءسوز ەمەس، ءدال سول "قازاقستاندىق ۇلت" سەكىلدى ساياسي-يدەولوگيالىق سيپاتى بار جوبا! ۇلتتى ەكىنشى ساتىعا قويۋ - ونىڭ ءمان-ماعىناسىن جوققا شىعارۋ. ياعني، "سەنىڭ قازاق بولعانىڭ ماڭىزدى ەمەس، مۇسىلمان بولعانىڭ ماڭىزدى" دەگەن بۇل اڭگىمەنىڭ جالعاسى - سەنىڭ ءداستۇرىڭ مەن سالتىڭ دا، ءتىلىڭ مەن ءدىلىڭ دە، ۇلتتىق بولمىس پەن تابيعاتىڭ دا، مادەنيەت، ادەبيەت، رۋحانياتىڭ دا، ءبارى-ءبارى ماڭىزدى ەمەس، مۇسىلمان بولعانىڭ ماڭىزدى دەپ ساباقتالادى!
قمدب بۇل ادامعا قاتىستى ءلام-ميم دەمەسە، تىيىم، توقتاۋ سالماسا، شارا قولدانباسا، بۇل قاۋىپتى تەندەنتسيا جاقسىلىق اكەلمەيدى!
Nurgeldi Abdygani
