Nursultan ustaz degen atpen elge tanylǵan bul kisini áleýmettik jeliden kóp kóremin. Paıǵambarlar qıssasy, Islam tarıhy týraly ýaǵyzdaryn Tık-Tok, You Tube-tan tyńdadym. QMDB ımamdarynyń standartty ýaǵyzdary edi.
Álginde sol jeliden bul "ustazdyń" taǵy bir qysqa vıdeosy (Reels) jyltyń ete qaldy. Bir podkastqa barypty. Sonda sóılegen sózi bolsa kerek. Búıdeıdi:
"Ult - ultymen, biraq Allanyń aldynda ult birinshi orynda turmaıdy. Allanyń aldynda din birinshi orynda turady. Mysaly, qazaq ulty, túrki ulty qanekeı dep, shaqyra ma Alla seni?! Joq! Musylmandar dep shaqyrady ǵoı. Muhammedtiń úmmeti dep shaqyrady ǵoı... Ateıst qazaqty qalaı shaqyrady?.. Sondyqtan adam birinshi musylman, sony umytpaýy kerek. Ult ekinshi orynda. Qazaq sen ekinshisiń... Sen birinshi Qudaıdyń aldyndaǵy quldyq mártebeńdi bilip alý kereksiń,- deıdi.
Al ne deısizder, buǵan?
Nursultan Rysmaǵambetuly degen bul kisiniń fanattary óte kóp. Jáne olar kún sanap ósip keledi. Qarańyz:
Instagram-daǵy paraqshasyna jazylǵandar sany: 423 myń adam.
Tık-Toktaǵy "Nursultan Rysmaǵambetuly" degen akkaýnttaǵy jazylýy sany: 13,8 myń adam.
You Tube-tegi ártúrli arnalardaǵy "Nursultan ustazdyń" suhbattary, ýaǵyz-dáristeri, podkasttarynyń qaralymy: 20 myńnan bastalyp, 1,5 mıllıonnan asady. "Ilim nury" deıtin arnadaǵy ýaǵyz-dáristeriniń ortasha qaralymy 300 myńnyń aınalasynda. Eń kóp qaralǵany – 1,5 mln.
Álginde jypyrlaǵan adamnyń ortasynda otyryp ýaǵyz aıtyp jatqan da osy kisi. Atyraýdaǵy meshitte jurt "Allahý akbarlap" qarsy alyp jatqan da osy kisi.
Osynsha aýdıtorııany aýzyna qaratyp otyrǵan Nursultan Rysmaǵambetuly qansha jerden "áýlıeshalys" adam bolsa da, bul aıtqanymen kelispeımin!
Kezinde Qazaqstan úkimetiniń "qazaqstandyq ult" degen jobasyna esti jurt óre-túregelip qarsy bolǵan edi. Zııalylar qarsy sóz aıtyp, sol kezdegi bıliktilerdiń betin qaıtarǵan edi.
"Hıt-ımamnyń" myna aıtqandary da sóz arasyndaǵy sóz emes, dál sol "qazaqstandyq ult" sekildi saıası-ıdeologııalyq sıpaty bar joba! Ultty ekinshi satyǵa qoıý - onyń mán-maǵynasyn joqqa shyǵarý. Iaǵnı, "seniń qazaq bolǵanyń mańyzdy emes, musylman bolǵanyń mańyzdy" degen bul áńgimeniń jalǵasy - seniń dástúriń men saltyń da, tiliń men diliń de, ulttyq bolmys pen tabıǵatyń da, mádenıet, ádebıet, rýhanııatyń da, bári-bári mańyzdy emes, musylman bolǵanyń mańyzdy dep sabaqtalady!
QMDB bul adamǵa qatysty lám-mım demese, tyıym, toqtaý salmasa, shara qoldanbasa, bul qaýipti tendenııa jaqsylyq ákelmeıdi!
Nurgeldi Abdygani
