قوناەۆتا ەكى پوليتسيا قىزمەتكەرى 14 جاستاعى قىزبەن جىنىستىق قارىم-قاتىناسقا تۇسكەنى تۋرالى اقپارات تاراعان بولاتىن. قازىر قوس كۇدىكتى قاماۋعا الىندى، دەپ حابارلايدى "ادىرنا" ءتىلشىسى.
بۇل تۋرالى "نە مولچي!" قورىنىڭ باسشىسى، قۇقىق قورعاۋشى دينا ءتاڭسارى مالىمدەدى. الەۋمەتتىك جەلىدە جاريالانعان حابارلامادا كامەلەت جاسقا تولماعان قىزبەن جىنىستىق قاتىناسقا تۇسكەن قوس پوليتسەي ارەكەتتەرىن ۆيدەوعا ءتۇسىرىپ العانى ايتىلعان.
ءىستى باقىلاۋعا العان قۇزىرلى ورگان ەكس-پوليتسەيلەردى ۇستادى.
«بيىلعى 7 قاراشادا پوليتسياعا الماتى وبلىسىنىڭ 43 جاستاعى تۇرعىنى كامەلەتكە تولماعان قىزىنا قاتىستى ەكى بەلگىسىز ادامنىڭ جىنىستىق سيپاتتاعى زورلىق-زومبىلىق جاساعانى تۋرالى ارىزداندى. سول كۇنى قىلمىستىق ءىس قر قىلمىستىق كودەكسىنىڭ 120-بابى 3-1-بولىگىنىڭ 1-تارماعى بويىنشا وبلىستىق پوليتسيادا تىركەلدى»، - دەپ حابارلادى الماتى وبلىستىق پد ءباسپاسوز قىزمەتى.
جەدەل-ىزدەستىرۋ ءىس-شارالارى بارىسىندا پوليتسيا قىزمەتكەرلەرى 2000 جانە 2001 جىلدارى تۋعان كۇدىكتىلەردىڭ جەكە باسىن انىقتاپ، ۇستاعان. تەرگەۋ ناتيجەلەرى بويىنشا ولار قاماۋعا الىندى.
بالا قۇقىقتارى جونىندەگى ۋاكىل دينارا زاكيەۆا زورلانعان قىزدىڭ وتباسىمەن بايلانىستى ەكەنىن جازدى.
«قوناەۆ قالاسىندا بولعان كامەلەتكە تولماعان بالانىڭ جىنىستىق تيىسپەۋشىلىگىنە قارسى قىلمىسقا قاتىستى. قىز بالانىڭ تۋىستارىمەن بايلانىستامىن، بالامەن پسيحولوگتار جۇمىستى باستايدى دەپ كەلىستىك. تەرگەۋ شارالارى ءجۇرىپ جاتىر»، - دەپ جازدى زاكيەۆا.
ايتا كەتەيىك، بۇعان دەيىن الماتى وبلىسىندا وقۋشى قىزدى زورلاعان پوليتسەيلەر قاماۋعا الىنعانى حابارلاندى. ولارعا كامەلەتتىك جاسقا تولماعان بالاعا قاتىستى قىلمىس جاسادى دەگەن ايىپ تاعىلعان.
