جامبىل وبلىسىندا دارىگەرلەر جاڭا تۋعان ءسابيدى ساتىپ جىبەرگەن. بۇل تۋرالى Polisia.kz جاريالادى، دەپ حابارلايدى “ادىرنا” ءتىلشىسى.
اقپارات بويىنشا، 2023 جىلعى 12 قاڭتاردا جامبىل وبلىسى پوليتسيا دەپارتامەنتىنىڭ قىزمەتكەرلەرى تاراز قالاسى پروكۋراتۋراسىمەن بىرلەسىپ جۇرگىزگەن ارنايى ءىس-شارا بارىسىندا جاڭا تۋعان بالانى ساتۋ دەرەگىن انىقتادى.
"دەرەك بويىنشا قر قك-ءنىڭ 135-بابى 1-بولىگىمەن ("كامەلەتكە تولماعاندار ساۋداسى") سوتالدى تەرگەۋ امالدارى باستالدى. جامبىل وبلىسى پد ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى جەدەل-ىزدەستىرۋ ءىس-شارالارىن جۇرگىزۋ كەزىندە تاراز قالالىق كوپبەيىندى اۋرۋحاناسىنىڭ ەكى اكۋشەرىن انىقتاپ، ۇستادى. تەرگەۋ شارالارى بارىسىندا جاڭا تۋعان قىزدى اكۋشەر ماماندار 39 جاستاعى تاراز تۇرعىنىنا 1,5 ميلليون تەڭگەگە ساتىپ جىبەرگەنى بەلگىلى بولدى", - دەلىنگەن حابارلامادا.
قازىرگى تاڭدا قر قپك-ءنىڭ 128-بابىنا سايكەس كۇدىكتىلەر ۋاقىتشا ۇستاۋ يزولياتورىنا قاماۋعا الىنعان. ال بالانى ساتىپ الۋشىعا قاتىستى قولحاتپەن بوساتۋ تۇرىندەگى بۇلتارتپاۋ شاراسى تاعايىندالدى. نارەستە تاراز قالاسىنىڭ سابيلەر ۇيىنە ورنالاستىرىلدى. تەرگەۋ جالعاسىپ جاتىر.
