الماتىداعى رايىمبەك داڭعىلىنىڭ بويىنان كۇدىك تۋدىرعان ەر ادام ۇستالدى. ونىڭ جانىنان پىشاق پەن گراناتاعا ۇقساس زات تابىلعان. بۇل تۋرالى الماتى پوليتسيا دەپارتامەنتى 14 ماۋسىم كۇنى مالىمدەدى، دەپ حابارلايدى "ادىرنا".
مالىمەتكە سايكەس، پوليتسيا قىزمەتكەرلەرى كۇماندى ارەكەتىمەن كوزگە تۇسكەن ەر ادامدى توقتاتىپ، تەكسەرگەن.
"تەكسەرۋ بارىسىندا ونىڭ بارسەتكاسىنىڭ ىشىنەن پىشاق پەن سىرتقى ءتۇرى گراناتاعا ۇقساس زات تابىلدى. وقيعا ورنىنا جەدەل-تەرگەۋ توبى مەن ساپەر ماماندار شاقىرىلدى. تەكسەرۋ ناتيجەسىندە تاركىلەنگەن زاتتىڭ وقۋ-جاتتىعۋ گراناتاسى ەكەنى جانە ەشقانداي قاۋىپ توندىرمەيتىنى انىقتالدى", – دەپ حابارلادى پوليتسيا.
ۇستالعان ازاماتتىڭ ايتۋىنشا، ول بۇل زاتتاردى بۇرىن تاۋىپ العان، ال پىشاقتى تۇرمىستىق قاجەتتىلىك ءۇشىن وزىمەن بىرگە الىپ جۇرگەن. اتالعان مالىمەتتەردىڭ راس نە وتىرىگى تەكسەرىلىپ جاتىر.
سونداي-اق ەر ادامنىڭ بۇعان دەيىن قىلمىستىق جاۋاپكەرشىلىككە تارتىلعانى انىقتالدى.
"الماتى پوليتسياسى ازاماتتاردى وزدەرىمەن بىرگە قاۋىپ ءتوندىرۋى مۇمكىن زاتتاردى الىپ جۇرمەۋگە جانە قارۋ-جاراققا نەمەسە وق-دارىگە ۇقساس كۇماندى زاتتاردى تاپقان جاعدايدا بىردەن 102 نومىرىنە حابارلاۋعا شاقىرادى", – دەلىنگەن حابارلامادا.
