قىتاي رەسەيدەن يۋانمەن تولەنگەن مۇناي مەن كومىر پارتيالارىنىڭ كەلۋىن كۇتىپ وتىر. بۇل تۋرالى Bloomberg جازدى، دەپ حابارلايدى “ادىرنا” ۇلتتىق پورتالى.
ۆەدومستۆونىڭ مالىمەتىنشە، العاشقى جەتكىزىلىم ءساۋىر ايىنا جوسپارلانعان. قىتايدىڭ بىرنەشە كومپانياسى ناۋرىز ايىندا كومىر يمپورتىن ۇلتتىق ۆاليۋتامەن تولەدى. رەسەي مۇنايىن ساتۋشىلار دا جەرگىلىكتى ساتىپ الۋشىلارعا يۋانمەن تولەۋ مۇمكىندىگىن ۇسىندى. مامىر ايىندا قىتايعا شيكىزات كەلەدى دەپ كۇتىلۋدە.
ترەيدەرلەردىڭ ايتۋىنشا، بۇل باتىس ەلدەرى رەسەيدى حالىقارالىق قارجى جۇيەسىنەن اجىراتقاننان بەرى يۋانمەن تولەنگەن تاۋارلاردىڭ العاشقى جەتكىزىلىمى بولماق. بەيجىڭ مەن ماسكەۋ وسىلايشا ەۋروپا مەن امەريكا قۇراما شتاتتارى سالعان سانكتسيالار جاعدايىندا ساۋدانى ساقتاۋعا تىرىسۋدا، دەپ قورىتىندىلادى Bloomberg.
ايتا كەتەيىك، رەسەي اسكەرلەرىنىڭ ۋكراينانى دەميليتاريزاتسيالاۋ جانە دەنازيالاندىرۋ بويىنشا ارنايى وپەراتسياسى باستالعاننان كەيىن باتىس ماسكەۋگە قارسى سانكتسيالىق قىسىمدى كۇشەيتتى. ءىرى مەملەكەتتىك بانكتەر SWIFT جۇيەسىنەن اجىراتىلدى، كوپتەگەن برەندتەر رەسەي نارىعىنان شىعاتىنىن جاريالادى. ەۋرووداق رەسەيلىك ەنەرگيا تاسىمالداۋشىلارىنان باس تارتۋ ماسەلەسىن دە تالقىلاپ جاتىر.
كرەمل بۇل شارالاردى ەكونوميكالىق سوعىس دەپ اتادى. جاۋاپ رەتىندە رەسەي كاپيتالدى شىعارۋدى جانە شەتەلدىك كونتراگەنتتەر رەسەيلىك باعالى قاعازداردى ساتۋدى شەكتەدى. سونداي-اق، دوستىقتى ۇزگەن ەلدەر ءۇشىن گاز تولەمدەرىن رۋبلگە اۋىستىردى.
“ادىرنا” ۇلتتىق پورتالى
