سيريا پرەزيدەنتى باشار اساد جانە ونىڭ اعاسى ماحەر مەن ەكى سيريالىق گەنەرال ادامزاتقا قارسى قىلمىس جاسادى دەپ ايىپتالىپ وتىر. قۇقىق قورعاۋشىلار سوتقا شاعىم ءتۇسىردى. بۇل تۋرالى Euronewsجاريالادى، دەپ حابارلايدى “ادىرنا” ۇلتتىق پورتالى.
فرانتسيا سوتى سيريا پرەزيدەنتى باشار اسادتى بەيبىت تۇرعىندارعا قارسى تىيىم سالىنعان حيميالىق قارۋ قولداندى دەگەن ايىپپەن قاماۋعا الۋعا حالىقارالىق وردەر بەردى.
سونداي-اق پرەزيدەنتتىڭ اعاسى ماحەر ءال-اساد پەن سيريالىق ەكى گەنەرالدى قاماۋعا الۋعا وردەر بەرىلدى.
اقپاراتقا سايكەس، قۇقىق قورعاۋشىلار سيريادا 2013 جىلى تامىز ايىندا دۋما قالاسى مەن شىعىس گۋتا ايماعىندا زارين گازى قولدانىلعان حيميالىق شابۋىلدارعا بايلانىستى سوتقا شاعىم تۇسىرگەن. ول كەزدە 1000-نان استام ادام قايتىس بولعان.
