حالىقارالىق قىلمىستىق سوت رەسەيدىڭ بۇرىنعى قورعانىس ءمينيسترى سەرگەي شويگۋ مەن رەسەي باس شتابىنىڭ باسشىسى ۆالەري گەراسيموۆتى قاماۋعا الۋعا وردەر بەردى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
قوس شەنەۋنىككە قاتىستى ۋكراينانىڭ ەنەرگەتيكالىق ينفراقۇرىلىمىنا جاسالعان شابۋىلدار مەن بەيبىت تۇرعىندارعا زيان كەلتىرگەنى ءۇشىن قاماۋعا الۋعا وردەر بەردى.
حقس بۇعان دەيىن پرەزيدەنت ۆلاديمير پۋتين مەن بالالار ومبۋدسمەنى ماريا لۆوۆا-بەلوۆانى، سونداي-اق ەكى رەسەيلىك اسكەري قولباسشىنى قاماۋعا الۋعا وردەر بەرگەن بولاتىن.
حقس ءباسپاسوز حابارلاماسى شويگۋ مەن گەراسيموۆقا تاعىلعان ايىپتار 2022 جىلدىڭ 10 قازانىنان 2023 جىلدىڭ 9 ناۋرىزىنا دەيىن بولعان وقيعالارعا قاتىستى ەكەنى بەلگىلى بولدى.
سەبەبى بۇرىنعى قورعانىس ءمينيسترى جانە رەسەي قارۋلى كۇشتەرى باس شتابىنىڭ باستىعى ازاماتتىق وبەكتىلەردى نىساناعا الۋ بويىنشا اسكەري قىلمىسقا، سونداي-اق بەيبىت تۇرعىندارعا شامادان تىس زيان كەلتىرۋگە بايلانىستى اسكەري قىلمىسقا جاۋاپتى دەگەن بولجام بار.
بۇعان قوسا، ولار «ادامگەرشىلىككە جاتپايتىن ارەكەتتەر تۇرىندەگى ادامزاتقا قارسى قىلمىس جاسادى» دەگەن كۇدىككە ىلىنگەن.
«ەكى كۇدىكتى 2022 جىلدىڭ 10 قازانى مەن 2023 جىلدىڭ 9 ناۋرىزى ارالىعىندا رەسەيلىك اسكەري كۇشتەردىڭ ۋكراينانىڭ ەلەكتر ەنەرگەتيكالىق ينفراقۇرىلىمىنا جاساعان زىمىراندىق شابۋىلدارىنا جاۋاپتى دەۋگە نەگىزدى نەگىز بار»، - دەلىنگەن سوتتىڭ ءباسپاسوز قىزمەتى جولداعان حابارلاماسىندا.
"وسى ۋاقىت ىشىندە ۋكراينانىڭ ەلەكتر ستانتسيالارى مەن قوسالقى ستانتسيالارىنا كوپتەگەن شابۋىلدار جاسالدى", - دەپ تولىقتىرىلعان حقس مالىمدەمەسىندە.
2023 جىلدىڭ 17 ناۋرىزىندا حقس رەسەي پرەزيدەنتى پۋتين مەن بالالار ومبۋدسمەنى لۆوۆا-بەلوۆانى قاماۋعا الۋعا وردەر بەرگەن ەدى.
بىراق رەسەي سىرتقى ىستەر مينيسترلىگى گااگاداعى حالىقارالىق سوتتىڭ شەشىمدەرىنىڭ رەسەي ءۇشىن زاڭدى كۇشى جوق ەكەنىن مالىمدەدى.
