مەملەكەت باسشىسى قاسىم-جومارت توقاەۆ سالتانات نۇكەنوۆانىڭ ءىسى بويىنشا قۇقىق قورعاۋ ورگاندارىنىڭ باسشىلارىمەن كەڭەس وتكىزدى، - دەپ حابارلايدى “ادىرنا” ءتىلشىسى.
مەملەكەت باسشىسى ىشكى ىستەر ءمينيسترى ەرجان سادەنوۆپەن، باس پروكۋرور بەرىك اسىلوۆپەن، جوعارعى سوت توراعاسى اسلامبەك مەرعاليەۆپەن، سونداي-اق باسقا دا ءتيىستى ۆەدومستۆولاردىڭ باسشىلارىمەن كەزدەسۋ وتكىزدى.
جاقىندا ەلوردالىق مەيرامحانالاردىڭ بىرىندە ورىن العان اتىشۋلى كىسى ولىمىنە قاتىستى مەملەكەت باسشىسى ىشكى ىستەر مينيسترلىگى باسشىلىعىنا بۇل ءىستى ەرەكشە باقىلاۋدا ۇستاۋدى تاپسىردى.
«زاڭ بارىنە بىردەي بولۋى كەرەك. قوعامداعى ادىلەتتىلىك – بۇل زاڭ ۇستەمدىگىن نىعايتۋ جولىنداعى ازاماتتاردىڭ ىنتىماعى. ءادىل قازاقستان – قۇقىقتىق ءتارتىپ ورناعان ەل»، - دەپ ەسەپتەيدى پرەزيدەنت.
ەسكە سالايىق، مەملەكەت باسشىسى رەسپۋبليكا كۇنى قارساڭىندا سويلەگەن سوزىندە قۇقىقتىق مادەنيەتتى ارتتىرۋدى ءادىل قازاقستان قۇرۋدىڭ ەڭ ماڭىزدى شارتى دەپ اتاعان بولاتىن.
"زاڭسىزدىق، تارتىپسىزدىك، مادەنيەتسىزدىك ەلدى قۇردىمعا اپارادى. مۇنداي كەلەڭسىز قۇبىلىستارعا بۇكىل قوعام بولىپ قارسى تۇرۋىمىز كەرەك. وسىنى تەرەڭ ءتۇسىنۋ كەرەك. ءتارتىپ بار قوعام وركەنيەتتى بولادى، بۇل اكسيوما. ءاربىر ازامات ەلىمىزدىڭ زاڭىن قۇرمەتتەسە، بىرلىك، بەرەكە بولادى»، – دەدى قاسىم-جومارت توقاەۆ.
كەزدەسۋلەر مەن كەڭەسۋ بارىسىندا مەملەكەت باسشىسى قوعامدا ادىلەتتىلىك پەن ءتارتىپ ورناتۋدا قۇقىق قورعاۋ ورگاندارى مەن سوت جۇيەسىنە ۇلكەن جاۋاپكەرشىلىك جۇكتەلەتىنىن ەرەكشە اتاپ ءوتتى.
