ارمەنيا پرەمەر-ءمينيسترى نيكول پاشينيان 23 قاراشادا مينسكىدە وتەتىن ۇجىمدىق قاۋىپسىزدىك شارتى ۇيىمىنىڭ (ۇقشۇ) وتىرىسىنا قاتىسپايدى. ول بۇل شەشىمگە «تۇسىنىستىكپەن قاراۋدى» سۇرادى، بىراق باس تارتۋ سەبەبىن ايتپادى، دەپ حابارلايدى "ادىرنا" ۇلتتىق پورتالى.
«ارمەنيا پرەمەر-ءمينيسترى نيكول پاشينيان مەن بەلارۋس پرەزيدەنتى الەكساندر لۋكاشەنكو تەلەفون ارقىلى سويلەستى. ارمەنيا پرەمەر-ءمينيسترى بەلارۋس پرەزيدەنتىنە ۇقشۇ ۇجىمدىق قاۋىپسىزدىك كەڭەسىنىڭ وتىرىسىنا قاتىسا المايتىنىن حابارلادى جانە ونىڭ ۇقشۇ-داعى ارىپتەستەرى بۇل شەشىمگە تۇسىنىستىكپەن قارايدى دەپ ۇمىتتەنەتىنىن ايتتى»، - دەلىنگەن «ينتەرفاكس» اگەنتتىگىنىڭ حابارلاماسىندا.
لۋكاشەنكونىڭ ۋاعىزى
اڭگىمەدەن كەيىن بەلارۋس پرەزيدەنتى الەكساندر لۋكاشەنكو پاشينيانعا «ىدىراۋعا قاراي اسىعىس قادامدار جاساماۋدى» ەسكەرتتى. بۇل تۋرالى لۋكاشەنكونىڭ ءباسپاسوز حاتشىسى ناتاليا ەيسمونت ايتتى.
ونىڭ ايتۋىنشا، «پرەزيدەنت ءوزىنىڭ تاجىريبەسىنە جانە باسقا دا بەلگىلى ساياساتكەرلەردىڭ وسىعان ۇقساس جاعدايداعى ارەكەتتەرىنە سۇيەنە وتىرىپ، ارمەنيا پرەمەر-مينيسترىنە اسىقپاي، بەتالدى شەشىم قابىلداماي، ىدىراۋعا باعىتتالعان كەلەسى قادامداردى بايىپپەن قاراستىرۋدى ۇسىندى»، - دەدى ەيسمونت حانىم بەلارۋس مەملەكەتتىك بەلتا اگەنتتىگىنە.
ارمەنيا ۇكىمەتىنىڭ ءباسپاسوز قىزمەتى شاقىرتۋدان باس تارتۋدىڭ ناقتى سەبەبى نەدە ەكەنىن ايتپادى.
كرەملدىڭ وكىنىشى
كرەمل پاشينياننىڭ شەشىمىنە وكىنىش ءبىلدىردى.
«ءبىز ءاربىر ۇكىمەت باسشىسىنىڭ نەمەسە مەملەكەت باسشىسىنىڭ جۇمىس كەستەسىندە ءوز ءىس-شارالارى جانە ءوز جاعدايلارى بولۋى مۇمكىن ەكەنىن تۇسىنەمىز. بىراق تەك وكىنىشتى دەۋگە بولادى، ويتكەنى مۇنداي كەزدەسۋلەر پىكىر الماسۋعا جانە ناتيجەلەردى سالىستىرۋعا وتە جاقسى مۇمكىندىك بولىپ تابىلادى»، - دەدى ءپۋتيننىڭ ءباسپاسوز حاتشىسى دميتري پەسكوۆ.
ءبىر اپتا بۇرىن ارمەنيا قاۋىپسىزدىك كەڭەسىنىڭ حاتشىسى ارمەن گريگوريان تمد ەلدەرىندەگى ارىپتەستەرىمەن كەزدەسۋگە قاتىسۋدان باس تارتتى. بۇل شەشىمنىڭ سەبەپتەرى دە ايتىلمادى. ەل اتىنان ماسكەۋدەگى ەلشى ۆاگارشاك ارۋتيۋنيان قاتىستى. قازان ايىندا پاشينيان بىشكەككە تمد سامميتىنە دە، سونداي-اق ەاەو جانە تمد ۇكىمەتارالىق كەڭەستەرىنە دە بارعان جوق.
باراتىن جەردەن باس تارتۋ
ارمەنيا بيلىگى 2022 جىلدىڭ كۇزىندە ازىربايجانمەن شەكاراداعى جاعدايدىڭ شيەلەنىسۋىنە بايلانىستى ۇقشۇ-نىڭ جاۋاپ بەرمەگەنىنە نارازىلىعىن ءبىلدىردى. ناتيجەسىندە ەرەۆان ۇقشۇ ۇجىمدىق قاۋىپسىزدىك كەڭەسىنىڭ دەكلاراتسياسى مەن ارمەنياعا كومەك كورسەتۋ جونىندەگى بىرلەسكەن شارالار جوباسىنا قول قويمادى.
بيىل ارمەنيا ءوز اۋماعىندا ۇقشۇ «مىزعىماس باۋىرلاستىق-2023» مانەۆرلەرىن وتكىزۋدەن باس تارتتى، ولاردى ورىنسىز دەپ اتادى، سونداي-اق ۇيىمنىڭ يادرولىق نىسانداعى اپاتتى جويۋ جونىندەگى كەزەكتى بىرلەسكەن وقۋ-جاتتىعۋىنا قاتىسقان جوق.
قازان ايىندا پاشينيان The Wall Street Journal باسىلىمىنا بەرگەن سۇحباتىندا ءوز ەلىندە رەسەيلىك بازالاردىڭ ساقتالۋىنان ەشقانداي ارتىقشىلىق كورمەگەنىن ايتقان. پرەمەر-مينيستر سونداي-اق ماسكەۋدى قاراباقتاعى قاقتىعىستىڭ شيەلەنىسۋىنە بايلانىستى وداقتاستىق مىندەتتەمەلەرىن ورىندامادى دەپ ايىپتادى.
