ارمەنيا پرەمەر-مينيسترى نيكول پاشينياننىڭ ۇشاعى شەتەلگە ساپار بارىسىندا ازەربايجان اۋە كەڭىستىگى ارقىلى ۇشىپ ءوتتى، دەپ حابارلايدى "ادىرنا" ۇلتتىق پورتالى.
بۇل تۋرالى 6 قىركۇيەكتە ۇكىمەت باسشىسىنىڭ ءباسپاسوز حاتشىسى نازەلي باگداساريان حابارلادى.
ونىڭ ايتۋىنشا، رەيس 30 تامىزدا ارمەنيادان ۇشىپ شىعىپ، 6 قىركۇيەككە قاراعان ءتۇنى ەلگە قايتا ورالعان.
«8 تامىزدا ۆاشينگتوندا بەيبىتشىلىك ورناعاننان كەيىن ارمەنيانىڭ ءتيىستى ورگاندارى ازەربايجاننان پرەمەر-مينيستر ۇشاعىنىڭ اۋە كەڭىستىگى ارقىلى ۇشۋىنا رۇقسات سۇرادى جانە وڭ جاۋاپ الدى»، — دەدى باگداساريان.
ول بۇل جاعدايدى «وڭىردەگى كوممۋنيكاتسيالاردى اشۋعا، بەيبىت كۇن ءتارتىبىن ىلگەرىلەتۋگە جانە ءوزارا سەنىم اتموسفەراسىن قالىپتاستىرۋعا جاسالعان ناقتى قادام» دەپ اتادى.
ايتا كەتەيىك، ازەربايجان اۋە كومپانيالارى بۇرىننان بەرى ەلدىڭ نەگىزگى اۋماعى مەن ناحچىۆان اۆتونوميالىق رەسپۋبليكاسى اراسىنداعى بايلانىستى ارمەنيا اۋە كەڭىستىگى ارقىلى قامتاماسىز ەتىپ كەلەدى.
