سالتانات نۇكەنوۆانىڭ تۋىستارى ونى ءولتىردى دەگەن كۇدىككە ىلىنگەن كۇيەۋى، ەكس-مينيستر قۋاندىق بيشىمباەۆتىڭ اعاسىنىڭ دا جاۋاپقا تارتىلۋىن تالاپ ەتىپ وتىر، دەپ حابارلايدى "ادىرنا" پورتالى كتك تەلەارناسىنىڭ سايتىنا سىلتەپ.
نۇكەنوۆتەر وتباسى بۇرىنعى مينيستر بيشىمباەۆتىڭ ىقپالدى بايلانىستارى بار تۋىستارى تەرگەۋگە قىسىم كورسەتۋى مۇمكىن دەپ سانايدى. سوندىقتان مارقۇم قىزدىڭ تۋىستارى تەرگەۋگە قاتىسقان ءاربىر ادام ءوزىنىڭ بەيتاراپتىعىن ساقتايتىنىنا كوز جەتكىزگەنشە ەلوردادا قالۋدى جوسپارلاپ وتىر. ال كەشە سالتاناتتىڭ تۋىستارى ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆپەن كەزدەستى. ايتۋلارىنشا، سالتاناتتىڭ ءولىمىن اسا ماڭىزدى ىستەردىڭ تەرگەۋشىسى تەكسەرىپ جاتىر. پوليتسيا ولارعا ءىس ناتيجەلەرىنىڭ بارلىعى وبەكتيۆتى جانە زاڭ تالابىنا ساي بولادى دەپ ۋادە بەردى.
"بۇل ءبىز ءۇشىن ورنى تولماس قايعى. اكە مەن انا ءۇشىن عانا ەمەس، ءبارىمىز ءۇشىن، بۇكىل وتباسىمىز ءۇشىن. ارينە، ءبىز سوڭىنا دەيىن كۇرەسەمىز. ەگەر جاعدايعا كوز جۇما سالىپ، وسى ماسەلەمەن كەلىسە سالساق قىلمىسكەر بوستاندىققا شىعىپ، مىندەتتى تۇردە تاعى ءبىر قىلمىس جاسايدى. بيشىمباەۆتى كىنالايتىن باسقا دا فاكتىلەر بار. سوندىقتان، راسىندا دا گاستروتسەنتر ديرەكتورىنىڭ ەكى ايعا قاماۋعا الىنعانى ءبىزدى قاناعاتتاندىرادى»، - دەدى سالتانات نۇكەنوۆانىڭ كوكەسى قايرات نۇكەنوۆ.
سالتانات نۇكەنوۆانىڭ تۋىستارى ەكس-ەكونوميكا ءمينيسترى مەن گاستروتسەنتر ديرەكتورىن قاتاڭ جازالاۋمەن قاتار، ولاردىڭ مالىمەتى بويىنشا بارلىعىن بىلە تۇرا ءتيىستى شارا قولدانباعان قۋاندىقتىڭ بيشىمباەۆتىڭ اعاسىن دا جاۋاپقا تارتۋ كەرەكتىگىن ايتتى.
«ونىڭ اعاسى بايجان نەمەسە باقىتجان كەلگەن دە، كىرىپ، جاعدايدى كورە تۇرا، سالتاناتتىڭ ءولىپ بارا جاتقانىن ءبىلىپ تۇرسا دا ەش حابار بەرمەگەن. ول ونى ۇيىقتاپ جاتىر، قورىلداپ جاتىر دەپ ويلاعان. قايداعى قورىلداۋ، ول ءولىپ بارا جاتىپ اۋىر دىبىستار شىعارعان. اۋىر حالدە جاتقانىنان-اق، ول جەردە قىلمىس ورىن العانى بەلگىلى ەدى. ول دەرەۋ قۇزىرلى ورگاندارعا حابارلاپ، جەدەل جاردەم شاقىرۋى كەرەك ەدى، سوندا ءبىزدىڭ قارىنداسىمىز ءتىرى قالار ەدى»، - دەيدى قايرات نۇكەنوۆ.
ول تۋىستارىنىڭ سوت-مەديتسينالىق ساراپشىلارعا قوسىمشا مالىمەتتەرى بار ەكەنىن، سوندىقتان ساراپتاما مەن تالداۋدىڭ ناقتى مەرزىمى تۋرالى بىلگىسى كەلەتىنىن ايتتى.
ايتا كەتەيىك، 2023 جىلدىڭ 9 قاراشاسىندا بۇرىنعى ۇلتتىق ەكونوميكا ءمينيسترى قۋاندىق بيشىمباەۆ ايەلىن ۇرىپ ءولتىردى دەگەن كۇدىكپەن ۇستالدى. قايعىلى وقيعا ەلورداداعى «باۋ» مەيرامحاناسىندا بولعان.
