ۇلىتاۋ وبلىسىندا پاترونات اتا-انا شامامەن 5 جىل بويى اسىراپ العان ءۇش بالانى ۇرىپ-سوعىپ، شارۋاعا جەگىپ قويعان، دەپ حابارلايدى “ادىرنا” ۇلتتىق پورتالى.
بۇل تۋرالى بالا قۇقىقتارى جونىندەگى ۋاكىل دينارا زاكيەۆا مالىمدەدى.
ونىڭ ايتۋىنشا، پروكۋراتۋرا مەن قورعانشىلىق جانە قامقورشىلىق ورگاندارى بۇل فاكتىنى اقپان ايىنىڭ باسىندا انىقتاعان.
2018 جىلى پاتروناتتىق تاربيەشىلەر بالالار ۇيىنەن ءبىر وتباسىنان ءۇش بالانى – ءبىر قىز جانە ەكى ۇلدى الىپ كەتكەن. ول كەزدە بالالار 8 بەن 14 جاس ارالىعىندا بولاتىن. انىقتالعانداي، اسىراپ الۋشىلار وسى ۋاقىت بويى بالالاردى دۇرىس تاماقتاندىرماي، ۇرىپ-سوعىپ، شارۋاشىلىققا ماجبۇرلەگەن.
«شارۋاشىلىققا كەلگەن كوميسسيا مۇشەلەرى بالالاردىڭ تۇرمىس جاعدايىنان شوشىپ كەتتى. ولاردىڭ دەنەسى كوگەرگەن، تىرتىقتارى بار، ارىق، شارشاعان، اش، ابدەن كىرلەگەن، ۇستەرىنە شۇبەرەك ىلگەن. وسى جىلدار بويى قامقورشى بالالاردى قورلاپ كەلگەن – ۇرىپ-سوعىپ، ازاپتاپ، 5 جىل بويى قۇلدىقتا ۇستاپ، سونداي-اق بالالاردىڭ جاردەماقىسىن الىپ وتىرعان»، - دەپ جەتكىزدى زاكيەۆا.
سونىمەن قاتار بالالاردىڭ ءىس جۇزىندە وقىماعانى دا انىقتالدى.
"قامقورشى تۇلعا قىز بالانى ەگەر ول جۇمىس جاساماسا نەمەسە شاعىمدانسا، ەندى باۋىرلارىن كورسەتپەيمىن دەپ قورقىتقان. ونىمەن قويماي، جاقىندا ول ءالى دە پاتروناتقا الۋعا بولاتىن بالالار بار ما دەپ قىزىعۋشىلىق بىلدىرگەن", — دەدى ول.
قۇقىق قورعاۋ ورگاندارى بۇل ماسەلە بويىنشا قىلمىستىق ءىستى تىركەدى. زاكيەۆا بۇگىندە بالالار بىرگە جانە قاۋىپسىزدىكتە ەكەنىن مالىمدەدى.
“ادىرنا” ۇلتتىق پورتالى
