قادىرلى دوستار!
ءبارىمىز ءبىر ساتكە توقتايىقشى! توقتايىق تا، الداعى توقتام تۋرالى ويلانايىقشى! دۇرىس تاڭداۋ جاساۋدان جاڭىلمايىقشى! تۋرا جولىمىزدان اداسپايىقشى! بولاشاق پرەزيدەنتىمىزدى ەلگە سىڭىرگەن ەڭبەگىنە، تالانتىنا، مىنەزىنە، ءبىلىم-بىلىكتەرىنە، قابىلەت-قارىمدارىنا بايلانىستى سايلاعانىمىز ءجون دەپ سانايمىن. وزدەرىڭىز جاقسى بىلەسىزدەر، قاسىم-جومارت كەمەلۇلى توقاەۆ كوپ سويلەمەيتىن، بىراق ءار قادامىن ويلانىپ، تولعانىپ بارىپ باساتىن، ءار ءسوزىن تارازىلاپ بارىپ العا تارتاتىن ناعىز ديپلومات، الەمدىك ساياساتتىڭ بىردەن-ءبىر سالماقتى بىلگىرى! مەن سىزدەردىڭ نازارلارىڭىزعا ق.ك.توقاەۆتى تاڭداۋدىڭ ءتورت ءتۇرلى تيىمدىلىگىن جەتكىزبەكپىن:
1-تيىمدىلىك. ق.ك.توقاەۆ – ەل تاۋەلسىزدىگىنىڭ تۇعىردان تايماۋىنا وزىندىك ۇلەس قوسقان بىلگىلى دە بەدەلدى ساياساتكەر، مەملەكەت قايراتكەرى. ەل تاۋەلسىزدىگىنە شيرەك عاسىر بويى ەلەۋلى ەڭبەك سىڭىرگەن تاريحي تۇلعا وسى تاۋەلسىزدىك تۋىن بيىك جەلبىرەتۋگە بار كۇش-جىگەرىن، قاجىر-قايراتىن سالاتىندىعىنا سەنىم كامىل. ال تاۋەلسىزدىگىمىزدەن ايرىلماۋ – «كەمەدەگى جانى ءبىر» ءبارىمىز ءۇشىن ءتيىمدى. تاۋەلسىزدىك – ەڭ اسىل ەلدىك مۇراتىمىز.
2-تيىمدىلىك. ق.ك.توقاەۆ – ءبىلىمى مەن بىلىگىن، تالانتى مەن تاپقىرلىعىن الەم ساياساتكەرلەرى مويىنداعان بىردەن-ءبىر ۇمىتكەر. باسقا ۇمىتكەرلەردىڭ اراسىنان بۇل تۇلعانىڭ الەمدىك ساياسي ارەناداعى بەدەلىمەن يىق تەڭەستىرەتىندەي جان تابىلمايدى. قولىنا كىر جۇقپاعان، ابىرويىنا داق تۇسپەگەن بىردەن-ءبىر اردا ازاماتتى ەلباسىمىزدىڭ دا ۇسىنۋى – كەمەڭگەرلىك. ق.ك.توقاەۆتىڭ ارقاشان بىلعانىشتان بويىن اۋلاق ۇستاعان، ارتىنان ەشقانداي ءسوز ەرمەگەن ساليقالى دا دانا تۇلعا ەكەندىگىن بىلە تۇرا، ءبىز اداسۋعا جول بەرمەۋىمىز كەرەك دەپ ويلايمىن. ساياساتكەر ءۇشىن الەم الدىندا دا ابىرويلى بولۋ – وڭاي شارۋا ەمەس. بۇنداي تۇلعانىڭ تابىلعاندىعى – ورتاق جەڭىسىمىز.
3-تيىمدىلىك. ق.ك.توقاەۆتىڭ تاعى ءبىر ارتىقشىلىعى – ءوز ەلىنىڭ تىرشىلىك-تىنىسىمەن قاتار، وزگە ەلدەردىڭ دە مادەنيەتى مەن ادەبيەتى جەتىستىكتەرىن، ساياسي احۋالدارىن، ەكونوميكالىق قىر-سىرلارىن تەرەڭ ءارى جان-جاقتى بىلەتىندىگىندە، ونى ءبىلىپ قانا قويماي، ءوز ەلىنىڭ ەسەبى ءۇشىن ۇتىمدى پايدالانا الاتىندىعىندا. ىسكەر باسشى – ءتيىمدى.
4-تيىمدىلىك. ق.ك.توقاەۆ – مەريتوكراتيالىق ۇستانىمى بەرىك، ەشقانداي رۋشىلدىق، جەرشىلدىك دەرتتەرىمەن اۋىرماعان جان. ق.ك.توقاەۆتىڭ سايلاۋعا ءتۇسۋىنىڭ ءوزى – مەريتوكراتيانىڭ مەرەيلى كورىنىسى. لايىقتى تۇلعا بولاشاقتا پرەزيدەنت بولىپ سايلانعان جاعدايدا دا وسى مەريتوكراتيالىق ۇستانىم تۇرعىسىنان ويلانىپ، شەشىم قابىلدايتىندىعى اقيقات. مەريتوكراتيالىق ادىلەتتىلىك قاعيداتتارىنا سۇيەنە وتىرىپ، ءبارىمىز بىرگە ق.ك.توقاەۆتى تاڭداساق، ءبىز دە مەريتوكراتيالىق مادەنيەتتىڭ قوعامدا ورنىعۋىنا كەڭ جول اشامىز. مەريتوكراتيا – بۇل ءسوزدى تۇسىنەتىندەرگە ءتيىمدى.
ۋا، حالايىق، تۋرا جولدان، تايمايىق،
قازاقستاننىڭ گۇلى بولىپ جاينايىق.
تاۋەلسىز ەل پرەزيدەنتى ەتىپ ءبىز،
قاسىم-جومارت كەمەلۇلىن سايلايىق!
ۋا حالايىق، جاقسىلىقتى جالعايىق،
اداسۋعا، جاڭىلۋعا بارمايىق.
تاۋەلسىز ەل پرەزيدەنتى ەتىپ ءبىز،
قاسىم-جومارت كەمەلۇلىن تاڭدايىق!
ۋا، حالايىق، تۇلعامىزعا سەنەيىك،
سول تۇلعانىڭ سوڭىنان ءبىز ەرەيىك.
قاسىم-جومارت كەمەلۇلى – لايىقتى،
لايىقتىعا داۋسىمىزدى بەرەيىك!
قۇرمەتپەن، بالتابەك نۇرعاليەۆ
