قازاقستاندىق فەم-بەلسەندىلەر ايەلدەرگە كورسەتىلەتىن زورلىق-زومبىلىققا قارسى فلەشموب باستادى. بۇل تۋرالى Myqty Women Instagram جەلىسى جاريالادى، دەپ حابارلايدى “ادىرنا” ۇلتتىق پورتالى.
ۆيدەودا ولار زاڭدى وزگەرتىپ، قىلمىسكەرلەرگە جازانى قاتاڭداتۋدى تالاپ ەتكەن.
ءبىزدىڭ تالاپ: ايەلدەرگە قاتىستى زورلىقتى توقتاتۋ،- دەگەن ۇرانمەن بىرنەشە قىز-كەلىنشەك ۇندەۋ جاسادى.
“كۇن سايىن جاڭالىقتاردان ايەلدەردى ۇرىپ-سوعىپ، زورلاپ، ءولتىرىپ جاتقان جاعدايلاردى كورەمىز. زورلىق-زومبىلىق قۇرباندارىنا كومەك كورسەتۋ قورلارى ءتىپتى ولاردىڭ بارلىعىنا كومەكتەسىپ ۇلگەرمەي جاتىر. قىلمىسكەرلەر جاۋاپكەرشىلىكتەن ۇنەمى جالتارىپ كەتەدى. سەبەبى زالىمدارعا قاتىستى زاڭناما جۇمساق. قازاقستاندا تۇرمىستىق زورلىق-زومبىلىق دەكريميناليزاتسيالانعان”، – دەلىنگەن جەلى جازباسىندا.
فەم-بەلسەندىلەر زاڭعا قاتىستى ۇكىمەتكە بىرنەشە تالاپتار قويدى:
- جاسالعان قىلمىستاردىڭ اۋىرلىعىنا سايكەس جازانىڭ نەعۇرلىم قاتاڭ نورمالارىن ەنگىزۋ، زورلىق كورسەتكەندەرگە جازانى قاتايتۋ. زورلىق-زومبىلىق ارەكەتىنە بىرىنشى رەت بارىپ تۇرسا دا قاتاڭ جازالاۋ;
- تۇرمىستىق زورلىق-زومبىلىققا قىلمىستىق قۇقىق بۇزۋشىلىق مارتەبەسىن بەرۋ جانە ونى بۇزۋشىلارعا قاتاڭ جازالار ەنگىزۋ ارقىلى قىلمىس رەتىندە قاراۋ;
- زورلىق-زومبىلىق قۇرباندارىنىڭ قاۋىپسىزدىگىن قورعاۋدىڭ ءتيىمدى تەتىكتەرىنە قولجەتىمدىلىگىن قامتاماسىز ەتۋ. سونداي-اق الەۋمەتتىك قىزمەتتەر تاراپىنان قولداۋ مەن كومەك كورسەتۋ;
- جاڭا زاڭداردىڭ ساقتالۋىنا ءتيىمدى باقىلاۋ جانە مونيتورينگ تەتىكتەرىن قۇرۋ. سونداي-اق قۇقىق قورعاۋ ورگاندارىن ايەلدەرگە قاتىستى زورلىق-زومبىلىقپەن كۇرەسۋ بويىنشا وقىتۋدى قامتاماسىز ەتۋ.
بەلسەندىلەر بارلىق ايەلدەردى زورلىق-زومبىلىققا قارسى بىرىگىپ، ەركىن ءومىر ءسۇرۋ ءۇشىن وزدەرىن قولداۋعا شاقىردى.
ءبىز، قازاقستان ايەلدەرى، ۇكىمەتتەن دەرەۋ جاۋاپ بەرۋدى تالاپ ەتەمىز. ءبىزدىڭ ماقساتىمىز – ايەلدەر قورعالعان جانە وزدەرىن تەڭ سەزىنەتىن قوعام قۇرۋ، – دەپ جازدى ولار.
