رەسەي پرەزيدەنتى مەن ونىڭ پروتوكول قىزمەتى ورتالىق ازيا پرەزيدەنتتەرىنىڭ اتى-ءجونىن بۇزىپ اتاۋدى داعدىعا اينالدىرىپ كەلەدى. ال ءپۋتيننىڭ ءوزىن كۇتىپ العان تاراپتىڭ ەڭ جوعارى لاۋازىمدى تۇلعاسىن دۇرىس اتاماۋىنىڭ استارىندا نە جاتىر؟
قاراشانىڭ 9-ىندا جاسى 72-گە قاراعان شاعىندا رەسەي پرەزيدەنتىنىڭ استاناعا كەلىپ، ءوزىن اۋەجايدان كۇتىپ العان قازاقستان باسشىسىنىڭ اتى-ءجونىن بۇزىپ اتاۋى ءبىرىنشى رەت ەمەس. بۇرىن دا قازاقستاننان تىس جەردەگى كەزدەسۋلەرىندە پۋتين وسىنداي جاعدايعا جول بەرگەن. الايدا كۇتىپ الۋشى تاراپتىڭ ەلىنە كەلىپ تۇرىپ، تورىندە وتىرىپ، رەسمي جيىندا ەڭ جوعارى لاۋازىمدى تۇلعانىڭ اتى-جونىنەن ءبىر ەمەس، ەكى رەت جاڭىلىسۋى العاش رەت بولىپ وتىر.
قاسىم-جومارتتان ارحيمەدكە دەيىن
ءپۋتيننىڭ قازاقستان پرەزيدەنتى قاسىم-جومارت توقاەۆتىڭ اتى-ءجونىن دۇرىس اتاماعان جيىنداردى اتاي بەرسە، بۇل دا ءبىر ءتىزىم بولۋعا جاراپ قالادى. ءبىر بىلتىردىڭ وزىندە ۇقشۇ-نىڭ ونلاين جيىنى, پەتەربۋرگ ەكونوميكالىق فورۋمى, جانە تامىز ايىنداعى كەزدەسۋىندە مۇنداي مۇكىستىك دۇركىن-دۇركىن قايتالانعان.
مۇنىڭ سىرتىندا بىرقانشا ءباسپاسوز-ءماسليحاتى مەن رەسمي وتىرىستاردا ول قازاقستان پرەزيدەنتىنىڭ اتى-ءجونىن ەسىنە تۇسىرە الماعان كەيىپ تانىتىپ، كەيدە «ارىپتەسىم»، كەيدە «قازاقستاننىڭ جاڭا پرەزيدەنتى» دەي سالاتىن.
مۇنى بىلاي قويعاندا، پۋتين قازاقستاننىڭ وبلىس باسشىلارىنىڭ ادەتتەن تىس ەسىمدەرىن دە كەلەمەجگە اينالدىرعان. ماسەلەن، قوستاناي وبلىسىنىڭ اكىم بولعان ارحيمەد مۇحامبەتوۆتى اكەسىنىڭ اتىمەن اتاپ، تاڭىرقاعان ءتۇر كورسەتكەن. قازاقستان مەن رەسەيدىڭ وڭىرارالىق فورۋمدارىنىڭ بىرىندە پۋتين سولتۇستىك قازاقستان وبلىسىنىڭ اكىمى قۇمار اقساقالوۆتى دا تەك فاميلياسىمەن عانا اتاپ، كەكەتكەن.
تۇتىعۋ استارىنداعى ارگۋمەنت
جوعارى بيلىك باسىندا وتىرعانىنا 20 جىلدان اسقان رەسەي باسشىسىنىڭ بۇل قىلىعى ادامي كەمشىلىك، اشەيىن جاڭىلىسۋ ەمەس سياقتى. اسىرەسە، ۋكراينا سوعىسى باستالعالى پۋتين قازاقستان جايىن ايتاردا تۇتىعا بەرەتىن بولعان. وعان قازاقستاننىڭ سوعىستى قولداماعان ۇستانىمى جانە پرەزيدەنت توقاەۆتىڭ مۇنى ءپۋتيننىڭ بەتىنە اشىق ايتۋى سەبەپ بولعانداي.
بۇل شىنداپ كەلگەندە، رەسەي پرەزيدەنتىنىڭ كەيبىر پوزيتسيادا ءوزىنىڭ كەلىسپەۋشىلىگىن وسىلاي ءبىلدىرۋىن داعدىعا اينالدىرعانىن كورسەتەدى.
لاۋازىمدى تۇلعانىڭ اتى-ءجونىن دۇرىس اتاماۋ ديپلوماتيادا بەرى دەگەندە قارسى تاراپتى سىيلاماۋشىلىقتى بىلدىرەدى. ال ماسەلەگە تەرەڭدەي قاراساق، اراداعى كۇردەلى جايلاردىڭ مۇكىسى بار تاراپ قالاعانداي شەشىلمەگەنىن دە كورسەتەدى. بۇل دا ءبىر ديلوماتيالىق ارگۋمەنتتىڭ الەمدە ەشقايدا كەزدەسپەگەن، تەڭدەسى جوق رەسەيلىك نۇسقاسى بولۋى مۇمكىن.
پۋتين عانا ەمەس، پروتوكولىنىڭ دا مۇكىسى بار
پرەزيدەنتتەردىڭ اتى-ءجونىن بۇزىپ اتاۋ رەسەيدە ساياسي ارەكەتكە اينالىپ كەلە جاتقان سياقتى. بۇل تەحنولوگيانى رەسەي، اسىرەسە، ورتالىق ازيا پرەزيدەنتتەرىنە بۇرىن دا بىرنەشە رەت قولدانىپ، «سىناقتان وتكىزىپ» كورگەن. بىراق بۇل سىناق نەگىزىنەن رەسەيگە قوناققا بارعاندار ءۇشىن بىرنەشە رەت قولدانىلعان ەدى.
بۇدان بىرنەشە جىل بۇرىن وزبەكستان پرەزيدەنتى شاۆكات ميرزەەۆ رەسەيگە ساپارلاپ بارعان كەزىندە ءپۋتيننىڭ پروتوكول قىزمەتى ونىڭ دا اكەسىنىڭ اتىن دۇرىس اتاي الماي «قور بولعان».
ونىڭ ۆيدەوسىن مىنا جەردەن كورە الاسىز.
ورتالىق ازيانىڭ تاعى ءبىر ەلىنىڭ پرەزيدەنتى بولعان تۇركىمەنستان باسشىسى قۇربانعۇلى بەردىمۇحاممەدوۆتى پۋتين نەۆسكي وردەنىمەن ماراپاتتايتىن كەزدە رەسەي پرەزيدەنتىنىڭ پروتوكولى ونىڭ دا اكەسىنىڭ اتىن مۇلدەم اتاي الماي، سوڭى زالدىڭ قوشەمەت، قول شاپالاقتاۋىنا ۇلاسقان.
ونىڭ ۆيدەوسىن مىنا جەردەن كورە الاسىز.
سوندىقتان رەسەي باسشىسىنىڭ قازاقستان پرەزيدەنتىنىڭ اتى-ءجونىن اتاۋدا مۇكىسى ۇستاپ قالاتىنى جەكە ادامنىڭ ەمەس، تۇتاس اپپاراتتىڭ قيتۇرقى ارەكەتى دەپ اتاۋعا نەگىز بار. جانە بۇل ورتالىق ازيا پرەزيدەنتتەرىنە دە قاتىستى بىرنەشە رەت قايتالانعان. ال ەڭ جاقىن كورشى جانە سانكتسيادان قۇتقارۋشى رەتىندە قازاقستان باسشىسىنىڭ ەسىمىن دۇرىستاپ ايتۋدا پۋتينگە ءالى دە تالاي تەر توگۋگە تۋرا كەلەتىن سياقتى...
جانات العاداي
