Reseı prezıdenti men onyń protokol qyzmeti Ortalyq Azııa prezıdentteriniń aty-jónin buzyp ataýdy daǵdyǵa aınaldyryp keledi. Al Pýtınniń ózin kútip alǵan taraptyń eń joǵary laýazymdy tulǵasyn durys atamaýynyń astarynda ne jatyr?
Qarashanyń 9-ynda jasy 72-ge qaraǵan shaǵynda Reseı prezıdentiniń Astanaǵa kelip, ózin áýejaıdan kútip alǵan Qazaqstan basshysynyń aty-jónin buzyp ataýy birinshi ret emes. Buryn da Qazaqstannan tys jerdegi kezdesýlerinde Pýtın osyndaı jaǵdaıǵa jol bergen. Alaıda kútip alýshy taraptyń eline kelip turyp, tórinde otyryp, resmı jıynda eń joǵary laýazymdy tulǵanyń aty-jóninen bir emes, eki ret jańylysýy alǵash ret bolyp otyr.
QASYM-JOMARTTAN ARHIMEDKE DEIIN
Pýtınniń Qazaqstan prezıdenti Qasym-Jomart Toqaevtyń aty-jónin durys atamaǵan jıyndardy ataı berse, bul da bir tizim bolýǵa jarap qalady. Bir byltyrdyń ózinde UQShU-nyń onlaın jıyny, Peterbýrg ekonomıkalyq forýmy, jáne tamyz aıyndaǵy kezdesýinde mundaı múkistik dúrkin-dúrkin qaıtalanǵan.
Munyń syrtynda birqansha baspasóz-máslıhaty men resmı otyrystarda ol Qazaqstan prezıdentiniń aty-jónin esine túsire almaǵan keıip tanytyp, keıde «áriptesim», keıde «Qazaqstannyń jańa prezıdenti» deı salatyn.
Muny bylaı qoıǵanda, Pýtın Qazaqstannyń oblys basshylarynyń ádetten tys esimderin de kelemejge aınaldyrǵan. Máselen, Qostanaı oblysynyń ákim bolǵan Arhımed Muhambetovti ákesiniń atymen atap, tańyrqaǵan túr kórsetken. Qazaqstan men Reseıdiń óńiraralyq forýmdarynyń birinde Pýtın Soltústik Qazaqstan oblysynyń ákimi Qumar Aqsaqalovty da tek famılııasymen ǵana atap, keketken.
TUTYǴÝ ASTARYNDAǴY ARGÝMENT
Joǵary bılik basynda otyrǵanyna 20 jyldan asqan Reseı basshysynyń bul qylyǵy adamı kemshilik, ásheıin jańylysý emes sııaqty. Ásirese, Ýkraına soǵysy bastalǵaly Pýtın Qazaqstan jaıyn aıtarda tutyǵa beretin bolǵan. Oǵan Qazaqstannyń soǵysty qoldamaǵan ustanymy jáne prezıdent Toqaevtyń muny Pýtınniń betine ashyq aıtýy sebep bolǵandaı.
Bul shyndap kelgende, Reseı prezıdentiniń keıbir pozıııada óziniń kelispeýshiligin osylaı bildirýin daǵdyǵa aınaldyrǵanyn kórsetedi.
Laýazymdy tulǵanyń aty-jónin durys atamaý dıplomatııada beri degende qarsy tarapty syılamaýshylyqty bildiredi. Al máselege tereńdeı qarasaq, aradaǵy kúrdeli jaılardyń múkisi bar tarap qalaǵandaı sheshilmegenin de kórsetedi. Bul da bir dılomatııalyq argýmenttiń álemde eshqaıda kezdespegen, teńdesi joq reseılik nusqasy bolýy múmkin.
PÝTIN ǴANA EMES, PROTOKOLYNYŃ DA MÚKISI BAR
Prezıdentterdiń aty-jónin buzyp ataý Reseıde saıası áreketke aınalyp kele jatqan sııaqty. Bul tehnologııany Reseı, ásirese, Ortalyq Azııa prezıdentterine buryn da birneshe ret qoldanyp, «synaqtan ótkizip» kórgen. Biraq bul synaq negizinen Reseıge qonaqqa barǵandar úshin birneshe ret qoldanylǵan edi.
Budan birneshe jyl buryn Ózbekstan prezıdenti Shavkat Mırzeev Reseıge saparlap barǵan kezinde Pýtınniń protokol qyzmeti onyń da ákesiniń atyn durys ataı almaı «qor bolǵan».
Onyń vıdeosyn myna jerden kóre alasyz.
Ortalyq Azııanyń taǵy bir eliniń prezıdenti bolǵan Túrkimenstan basshysy Qurbanǵuly Berdimuhammedovti Pýtın Nevskıı ordenimen marapattaıtyn kezde Reseı prezıdentiniń protokoly onyń da ákesiniń atyn múldem ataı almaı, sońy zaldyń qoshemet, qol shapalaqtaýyna ulasqan.
Onyń vıdeosyn myna jerden kóre alasyz.
Sondyqtan Reseı basshysynyń Qazaqstan prezıdentiniń aty-jónin ataýda múkisi ustap qalatyny jeke adamnyń emes, tutas apparattyń qıturqy áreketi dep ataýǵa negiz bar. Jáne bul Ortalyq Azııa prezıdentterine de qatysty birneshe ret qaıtalanǵan. Al eń jaqyn kórshi jáne sankııadan qutqarýshy retinde Qazaqstan basshysynyń esimin durystap aıtýda Pýtınge áli de talaı ter tógýge týra keletin sııaqty...
Janat Alǵadaı
