ۋكراينا پرەزيدەنتى ۆلاديمير زەلەنسكي گرۋزيانىڭ بۇرىنعى پرەزيدەنتى ميحايل سااكاشۆيليگە ۋكراينا ازاماتتىعىنان قايتارىپ بەردى. زەلەنسكي سااكاشۆيليدى ۋكراينا ازاماتتىعىنان ايىرعان جارلىقتىڭ كۇشىن جويدى. بۇل تۋرالى ۋكراينا پرەزيدەنتىنىڭ سايتى حابارلادى.
23 مامىردا سااكاشۆيلي زەلەنسكيدەن وزىنە ۋكراينا ازاماتتىعىن قايتارىپ بەرۋدى سۇراپ، حات جازعان.
2004-2013 جىلدارى گرۋزيانى باسقارعان رەفورماتور سااكاشۆيلي 2015 جىلى ۋكراينا ازاماتتىعىن قابىلداپ، گرۋزيا ازاماتتىعىنان ايىرىلعان. سول كەزدە ونى ۋكراينانىڭ ەكس-پرەزيدەنتى پەتر پوروشەنكو ودەسسا وبلىسىنىڭ گۋبەرناتورى ەتىپ تاعايىنداعان. سااكشاۆيلي بۇل قىزمەتتى از ۋاقىت اتقاردى دا، 2016 جىلعى قاراشادا ۇكىمەتتى جەمقورلىقپەن كۇرەسىنە كەدەرگى جاسادى دەپ ايىپتاپ، وتستاۆكاعا كەتكەن. سودان كەيىن ول پوروشەنكونى قاتتى سىناي باستاعان.
پەتر پوروشەنكو 2018 جىوى شىلدەدە شەتەلدە جۇرگەن سااكاشۆيليدى ۋكراينا ازاماتتىعىنان ايىرعان. پوروشەنكو بيلىگى سااكاشۆيليدى يانۋكوۆيچتىڭ "قىلمىستىق توبىنا قاتىسى بار" جانە "رەسەيدىڭ كيەۆكە قارسى ارانداتۋ جوسپارىنىڭ ءبىر بولىگى" دەپ ايىپتاعان. گرۋزيا پرەزيدەنتى بولىپ تۇرعان كەزىندە رەسەيمەن قارۋلى قاقتىعىستى باستان وتكەرگەن سااكاشۆيلي بۇل ايىپتاۋلاردى "ابسۋرد" دەپ سيپاتتايدى.
ۋكراينا ازاماتتىعىنان ايىرىلعان سوڭ ميحايل سااكاشۆيلي رەسمي تۇردە ازاماتتىعى جوق ادام دەپ تانىلىپ، نيدەرلاندتا تۇرۋعا ىقتيار حات العان.
"ازاتتىق" راديوسى
