سارقىت جەۋگە بولمايدى دەگەن باس سانيتاردىڭ ءسوزى جۇرتتى دۇرلىكتىرىپ تاستادى
ۇيگە كەلگەن قوناعىن قۇدايىنداي سىيلاپ، ۇلان اسىر تويىن قازىناعا بالايتىن قاراپايىم حالىق بەكشيننىڭ سارقىتتى سىناعانىن تۇسىنبەي الەك
قازاقستاننىڭ باس سانيتارى جانداربەك بەكشيننىڭ cارقىت جەۋگە بولمايدى دەگەن ءسوزى تۇسىنبەۋشىلىك تۋدىردى. ونىڭ ايتۋىنشا، ىشەك اۋرۋلارىنان ساقتانۋ ءۇشىن مەرەكەلىك داستارقانداعى تاماقتى ۇيگە الىپ كەلمەگەن ءجون. الايدا، باس سانيتاردىڭ بۇل سوزىنە قاراپايىم حالىقتىڭ ءۋاجى بار.
بەكشين كۇن ىسىعىندا ەل ىشىندەگى ىشەك ينفەكتسياسىنىڭ ارتۋىنا الاڭداپ وتىر، دەپ حابارلادى كتك.
"ىشەك ارۋرۋلارىنان ساقتانۋ ءۇشىن كامپيت جانە قۇرعاق كونيدتەرلىك ونىمدەردى ەسەپتەمەگەندە، مەرەكەلىك داستارقاننان الىپ كەلەتىن سارقىتتى قولدانباۋ كەرەك", - دەيدى دسم قوعامدىق دەنساۋلىق ساقتاۋ كوميتەتىنىڭ توراعاسى جانداربەك بەكشين.
الايدا، باس سانيتاردىڭ ۇسىنىسى داستۇرگە بەرىك تالاي جاننىڭ نارازىلىعىن تۋدىردى. الماتى وبلىسىنىڭ تۇرعىنى مەيرامگۇل بەكجانوۆانىڭ ايتۋىنشا، قانعا سىڭگەن قاسيەت سارقىتتان باس تارتۋ مۇمكىن ەمەس. ءۇش بالاسىنان 12 نەمەرە باعىپ-قاعىپ وتىرعان زەينەتكەر سارقىت بەرەكەلى تىرشىلىكتىڭ نەسىبەسى دەپ ەسەپتەيدى.
"داستارقاندا قالعان سارقىتتى الۋ كەرەك. ويتكەنى، ول داستارقاننىڭ باسىندا ۇلى، دانا ادامدار وتىر. سارقىتتى كەلىسىپ ءبولىپ الىپ، ۇيىندەگى بالالارىنا، نەمەرەلەرىنە سەندەرگە جۇعىستى بولسىن، الىڭدار، جەڭدەر دەپ اپارىپ بەرەدى. قازىرگى سارقىتتىڭ ءمان-ماعىناسى سول", - دەيدى مەيرامگۇل بەكجانوۆا.
ال، ەتنوگراف گۇلىم قابدولدينانىڭ ايتۋىنشا، سارقىت عۇرىپتىق ءمانىن جوعالتپاعان ەجەلگى ءداستۇردىڭ ءبىرى. بالا كەزىندە قوناققا كەتكەن ۇلكەندەردەن سارقىت كۇتىپ وسكەنىن جاسىرماعان ەتنوگراف داستۇردەن باس تارتۋعا بولمايتىنىن ايتادى.
"تويدى تويحانادا جاسايدى. ودان كوپ نارسە ىسىراپ بولىپ قالادى. سوندىقتان ءۇي ىشىندە بالالار اۋىز ءتيسىن دەپ سالىپ العان وتە دۇرىس. گيگيەنالىق تالاپتارعا ساي كەلمەيدى دەپ داستۇردەن باس تارتۋعا بولمايدى. ءبىزدىڭ قازاقتىڭ داستۇرىندەگى قاي ىرىمىن، قاي تىيىمىن المايىن، كورەگەندىك جاتىر ءار جاعىندا", - دەيدى ەتنوگراف گۇلىم قابدولدينا.
ءداستۇردىڭ وزىعى بار، توزىعى بار دەسەك تە، سارقىت الۋ قازىرگى سالتىمىزدىڭ اجىراماس بولىگى ەكەنى شىندىق. دەمەك، باس سانيتار قانشا جەردەن ۇسىنىس ايتسا دا، سان عاسىرلىق عۇرىپتى ۇستانعاندار اتا داستۇردەن ءبىر كۇندە باس تارتا قويۋى ەكىتالاي.
Sputnik.
